ތައިލޭންޑުގެ ވެރިރަށް ބެންކޮކުން ފުރި މަތިންދާބޯޓެއް ވެއްޓި، އޭގައި ދަތުރުކުރި 9 މީހުން މަރުވެއްޖެއެވެ. މި ހާދިސާ ހިނގީ އިއްޔެ މެންދުރުފަހު ބެންކޮކްގެ ސުވާނަބޫމީ އެއާޕޯޓުން ބޯޓު ފުރިތާ ކުޑައިރުކޮޅެއްގެ ތެރޭގައެވެ.
ތައިލޭންޑުގެ ސިވިލް އޭވިއޭޝަން އޮތޯރިޓީން މަޢުލޫމާތު ދިންގޮތުގައި، ބޯޓު ވެއްޓިފައިވަނީ އެއާޕޯޓާ ގާތްގަނޑަކަށް 40 ކިލޯމީޓަރު ދުރުގައިވާ ޗަޗޮއެންގްސާއޯ ޕްރޮވިންސްގެ މެންގްރޯވް ޗަސްބިމަކަށެވެ. ބޯޓުގައި ތިބި މީހުންގެ ތެރޭގައި ހޮންކޮންގުގެ ފަތުރުވެރިންނާއި، ތައިލޭންޑުގެ ދެ އަންހެން ފަޅުވެރިންނާއި، ޕައިލެޓާއި ކޯ-ޕައިލެޓް ހިމެނޭ ކަމަށް އެ އޮތޯރިޓީގެ ތަރުޖަމާނު ވިދާޅުވިއެވެ.
ވެއްޓުނު ބޯޓަކީ ތައިލޭންޑުގެ ފްލައިން ސާވިސް ކޮމްޕެނީން ހިންގާ ސެސްނާ ކެރަވަން ސީ208ބީ ނަމަކަށް ކިޔާ ޓާބޯޕްރޮޕް ބޯޓެކެވެ. ބޯޓު ފުރީ މެންދުރު 2:46 ގައި ކަމަށާއި، އެއާ ޓްރެފިކް ކޮންޓްރޯލުން ބޯޓާ އޮތް ގުޅުން ކެނޑުނީ އޭގެ 11 މިނެޓް ފަހުން ކަމަށް އޮތޯރިޓީން ބުނެފައިވެއެވެ.
މިހާތަނަށް ކުރެވިފައިވާ ތަޙުޤީޤުތަކުން ބޯޓު ވެއްޓުނު ސަބަބު އަދި ވަނީ ދެނެގަނެވިފައެއް ނުވެއެވެ. މި ހާދިސާއާ ގުޅިގެން އިތުރު ތަޙުޤީޤުތައް ކުރިއަށްދާ ކަމަށް ކަމާބެހޭ އިދާރާތަކުން މަޢުލޫމާތު ދީފައިވެއެވެ.