ތައިލެންޑުން ބުދަ ދުވަހު ހާމަކުރި ގޮތުގައި، އެމްޕޮކްސްގެ އައު އަދި ނުރައްކާތެރި ދަރަޖައިގެ ފުރަތަމަ ކޭސް އެ ޤައުމުގައި ފެނިފައިވާ ކަމަށް ބެލެވެއެވެ. މިއީ ދުނިޔޭގެ ޞިއްޙަތު ޖަމްޢިއްޔާއިން ދުނިޔޭގެ ޢާންމު ޞިއްޙަތަށް ނުރައްކާވެދާނެ ކަމެއްގެ ގޮތުގައި އިޢުލާނުކޮށްފައިވާ ބައްޔެކެވެ.
ތައިލެންޑުގެ ބަލި ކޮންޓްރޯލް ޑިޕާޓްމަންޓުގެ ވެރިޔާ ތޯންޗައި ކީރަތިހަޓަޔަކޯން އޭއެފްޕީއަށް މަޢުލޫމާތު ދެމުން ބުނީ، ބަލި ޖެހިފައިވާ މީހާއަކީ އެފްރިކާގެ ޤައުމަކުން ތައިލެންޑަށް ދަތުރުކުރި ޔޫރަޕުގެ މީހެއް ކަމަށެވެ. ބަލީގެ ދަރަޖަ ކަށަވަރުކުރުމަށް ލެބޯޓަރީ ޓެސްޓުތައް ކުރަމުންދާ ކަމަށާއި، ނަމަވެސް އޮފިޝަލުން ގަބޫލުކުރާ ގޮތުގައި މިއީ ކްލޭޑް 1 ގެ ދަރަޖަ ކަމަށް އޭނާ ވިދާޅުވިއެވެ.
”އަޅުގަނޑުމެން ޓެސްޓުކޮށް ބެލިއިރު، މި މީހާއަށް ކަށަވަރުންވެސް އެމްޕޮކްސް ޖެހިފައިވޭ. އަދި އެއީ ކްލޭޑް 2 ނޫންކަންވެސް ކަށަވަރު,“ ތޯންޗައި ވިދާޅުވިއެވެ. ”އަޅުގަނޑުމެންނަށް ޔަޤީން މި މީހާއަށް ކްލޭޑް 1 ގެ ދަރަޖަ ޖެހިފައިވާކަން. ނަމަވެސް ފައިނަލް ނަތީޖާ ލިބުމަށް އިތުރު ދެ ދުވަސް ވާންޖެހޭނެ.“
ބަލި ޖެހިފައިވާ މީހާ ވަނީ ހޮސްޕިޓަލުގައި އެކަހެރިކުރެވިފައެވެ.
އެފްރިކާގައި އެމްޕޮކްސްގެ ކޭސްތަކާއި މަރުތައް އިތުރުވަމުންދާ ކަމަށާއި، ޖުލައި މަހުން ފެށިގެން ކޮންގޯ، ބުރުންޑީ، ކެންޔާ، ރުވާންޑާ އަދި ޔުގާންޑާގައި މި ބަލީގެ ފެތުރުންތައް ރިޕޯޓުކުރެވިފައިވެއެވެ. އެމްޕޮކްސްގެ އައު ދަރަޖަ ކަމަށްވާ ކްލޭޑް 1ބީ އަކީ ކުރީގެ ދަރަޖަތަކަށްވުރެ މަރުވުމުގެ ނިސްބަތް މަތި އަދި ފެތުރުން އަވަސް ދަރަޖައެކެވެ. ދުނިޔޭގެ ޞިއްޙަތު ޖަމްޢިއްޔާއިން ބުނާ ގޮތުގައި މި ދަރަޖައިގެ ސަބަބުން މަރުވާ މިންވަރަކީ 3.6 އިންސައްތައެވެ. އަދި ކުޑަކުދިންނަށް މި ބަލީގެ ނުރައްކާ އިތުރުކަމަށް ވެސް އެ ޖަމްޢިއްޔާއިން ފާހަގަކޮށްފައިވެއެވެ.
ކުރިން މޮންކީޕޮކްސްގެ ނަމުން މަޝްހޫރުވެފައިވާ މި ބަލި ފުރަތަމަ ދެނެގަނެވުނީ 1958 ވަނަ އަހަރު ޑެންމާކުގައި، ދިރާސާތަކަށް ގެންގުޅުނު ކޮތަރުތަކެއްގެ ކިބައިންނެވެ.
މިއަހަރު ކޮންގޯގައި 16,000 އަށްވުރެ ގިނަ ކޭސް ރިޕޯޓުކުރެވި، 500 އަށްވުރެ ގިނަ މީހުން މަރުވެފައިވާ ކަމަށް ވަނީ ރިޕޯޓުކުރެވިފައެވެ.
އެފްރިކާއިން ބޭރުގައި ފެނުނު ފުރަތަމަ ކްލޭޑް 1 ގެ ކޭސް ރިޕޯޓުކޮށްފައިވަނީ އޯގަސްޓް 15 ގައި ސްވީޑަނުންނެވެ.
އެމްޕޮކްސްއަކީ ބަލި ޖެހިފައިވާ ޖަނަވާރުތަކުން އުފެދޭ ވައިރަހެއްގެ ސަބަބުން ޖެހޭ ބައްޔެކެވެ. ނަމަވެސް މި ބަލި އިންސާނުންގެ މެދުގައި ފެތުރެނީ ގާތުން ކުރެވޭ ޖިސްމާނީ ގުޅުމުގެ ސަބަބުންނެވެ. މި ބައްޔަށް ޖެހުމުން ހުމާއި، މަސްތަކުގައި ރިހުމާއި، ހަމުގައި ބޮޑެތި ފުއްޕާފައިވާ ފާރުތައް އުފެދެއެވެ.
ތައިލެންޑުގައި މި ބަލީގެ އައު ދަރަޖައެއްގެ ކޭސްއެއް ފެނުމާ ގުޅިގެން، އޭޝިއާ ސަރަޙައްދުގެ އެހެން ޤައުމުތަކުންވެސް ސަމާލުކަން އިތުރުކޮށް، ރައްކާތެރިކަމުގެ ފިޔަވަޅުތައް އަޅަމުންދާނެ ކަމަށް ބެލެވެއެވެ.