ހަނގުރާމައިގެ ތެރޭގައިވާ ޔަމަނުގައި ބޯކޮށް ވެހުނު ވާރޭގެ ސަބަބުން ފެންބޮޑުވެ، ޖުލައި މަހުން ފެށިގެން މަދުވެގެން 60 މީހުން މަރުވެފައިވާ ކަމަށް އދ. އިން ހޯމަ ދުވަހު ބުނެފިއެވެ. މީގެ އިތުރުން 13 މީހުން އަދިވެސް ގެއްލިފައިވާ ކަމަށާއި، ޖުމުލަ 268,000 މީހުންނަށް މި ކާރިސާގެ އަސަރު ކޮށްފައިވާ ކަމަށްވެސް އދ. އިން ބުނެފައިވެއެވެ.
އދ. ގެ އިންސާނީ އެހީގެ އޭޖެންސީ އޯޗާއިން ހޯމަ ދުވަހު ނެރުނު ރިޕޯޓެއްގައި ބުނެފައިވާ ގޮތުގައި، ޖުލައި މަހުން ފެށިގެން ކުއްލި ފެންބޮޑުވުމުގެ ސަބަބުން ހޮދެއިދާ ޕްރޮވިންސްގައި 36 މީހުން، އިބްގައި 9 މީހުން، މާރިބްގައި 8 މީހުން އަދި ތައިޒްގައި 7 މީހުން މަރުވެފައިވެއެވެ.
އޯޗާއިން ބުނެފައިވާ ގޮތުގައި ސްކޫލްތަކާއި، މަގުތަކާއި، ޞިއްޙީ ޚިދުމަތްދޭ ތަންތަނުގެ އިތުރުން އެހެނިހެން އާންމު ވަސީލަތްތަކަށްވެސް މީގެ އަސަރުކޮށްފައިވެއެވެ. އަދި ކުރިންވެސް ވަރަށް ނާޒުކު ހާލަތެއްގައި އޮތް ދިރިއުޅުމުގެ ވަސީލަތްތައް މިހާރު ވަނީ ފެނުގައި ބުއްސައިލާފައެވެ.
ހޮދެއިދާއާއި މާރިބްގައި އެކަނިވެސް މަދުވެގެން 600 މީހުންނަށް ފެންބޮޑުވުމުގެ ސަބަބުން އަނިޔާވެފައިވާ ކަމަށާއި، ހޮދެއިދާއާއި ތައިޒްގައި ޖުމުލަ 13 މީހުން އަދިވެސް ގެއްލިފައިވާ ކަމަށް އޯޗާއިން ބުނެފައިވެއެވެ.
އޯޗާއިން އިތުރަށް ބުނެފައިވަނީ ގަދަ މޫސުން ސެޕްޓެމްބަރު މަހާ ހަމައަށް ދެމިގެންދާނެ ކަމަށް ބެލެވޭ ކަމަށާއި، އިތުރަށް ބޯކޮށް ވާރޭވެހުމުގެ އިންޒާރު ދެވިފައިވާ ކަމަށެވެ.
ޔުނިވަރސިޓީ އޮފް ނޮޓްރެ ޑޭމްގެ ގްލޯބަލް އެޑަޕްޓޭޝަން އިނީޝިއޭޓިވްއިން ޔަމަނު ވަނީ މޫސުމަށް އަންނަ ބަދަލުތަކުގެ ސަބަބުން އެންމެ ބޮޑަށް އަސަރުކުރާނެ ސަރަހައްދުގެ ޤައުމުތަކުގެ ތެރޭގައި ހިމަނާފައެވެ.
އިންޓަނޭޝަނަލް ކޮމިޓީ އޮފް ދަ ރެޑް ކްރޮސް އަދި ނޯވީޖިއަން ރެޑް ކްރޮސްގެ 2023 ވަނަ އަހަރުގެ ރިޕޯޓެއްގައި ބުނެފައިވާ ގޮތުން، ފާއިތުވި އަހަރުތަކުގައި އިންޑިއާ ކަނޑުގެ މޫސުމީ ބަދަލުތަކުގެ ސަބަބުން ޔަމަނުގައި ވާރޭވެހޭ މިންވަރާއި ގަދަފަދަކަން އިތުރުވެފައިވެއެވެ. އަދި 2019، 2020 އަދި 2021 ވަނަ އަހަރުވެސް ޔަމަނުގައި ވަނީ ގަދަ ފެންބޮޑުވުންތަކެއް އައިސްފައެވެ.
ޔަމަނުގައި ގާތްގަނޑަކަށް އެއް ދަޅައެއްހާ ދުވަސްވީ ހަނގުރާމައެއް ހިނގަމުންދެއެވެ. މި ހަނގުރާމަ ފެށުނީ 2014 ވަނަ އަހަރު ހޫތީ ބަޣާވާތްތެރިން ވެރިކަމުގެ ވެރިރަށް ސަނާ ހިފުމާ ގުޅިގެން، ބައިނަލްއަޤްވާމީ ގޮތުން ބަލައިގަނެފައިވާ ސަރުކާރު ދެކުނުގެ އަދަން ސިޓީއަށް ފިލައިގެން ދިއުމުންނެވެ.
މި ހަނގުރާމައިގެ ސަބަބުން ދުނިޔޭގެ އެންމެ ނުރައްކާތެރި އިންސާނީ ކާރިސާތަކުގެ ތެރެއިން އެއް ކާރިސާ ވަނީ ކުރިމަތިވެފައެވެ. އަދި ސަލާމަތީ ގޮތުން ހުރި ގޮންޖެހުންތަކާއި އެހީ ފޯރުކޮށްދިނުމުގައި ހުރި ލޮޖިސްޓިކަލް ދަތިތަކުގެ ސަބަބުން އެހީ ފޯރުކޮށްދިނުމަށް ވަނީ ވަރަށް ބޮޑަށް ދަތިވެފައެވެ.
ފާއިތުވި ހަފުތާގައި އދ. އިން އިންޒާރުދީފައިވަނީ ޔަމަނުގައި ދިމާވެފައިވާ ގަދަ މޫސުމުގެ ހާލަތަށް އިޖާބަދިނުމަށް ކުއްލި ގޮތެއްގައި 4.9 މިލިއަން ޑޮލަރު ބޭނުންވާ ކަމަށެވެ.