ޕްރިމިއާ ލީގުގެ ޗެމްޕިއަންކަން ހޯދުމަށް ދެ ކްލަބުގެ މެދުގައި އޮތް ވަރުގަދަ ވާދަވެރިކަމުގެ ތެރޭގައި ސްޕެއިންގެ ކޯޗު ޕެޕް ގާޑިއޯލާ އާއި މެންޗެސްޓާ ސިޓީން ބިނާކުރި ޓީމުތަކަށް ކުރާ ފުން އިހުތިރާމްގެ ސަބަބުން، ސްކައި ބްލޫސްއަށް ކުރިމަތިވެފައިވާ މާލީ މައްސަލަތަކާ ގުޅިގެން އެއްޗެއް ބުނަން ފަސްޖެހޭ ކަމަށް ލިވަޕޫލްގެ ކުރީގެ ކޯޗު ޔާގަން ކްލޮޕް ބުނެފިއެވެ.
މި މައްސަލައާ ގުޅިގެން މިނިވަން ޕެނަލަކުން މިދިޔަ އަންގާރަ ދުވަހު ނިންމާފައިވަނީ މެންޗެސްޓާ ސިޓީން މާލީ ގަވާއިދުތަކާ ޚިލާފު ބޮޑެތި ކަންތައްތަކެއް ހިންގާފައިވާ ކަމަށެވެ. ނަމަވެސް، ސިޓީން ދަނީ މި ހުރިހާ ތުހުމަތުތަކެއް ދޮގުކޮށް، އެ ނިންމުން އިސްތިއުނާފު ކުރަން ތައްޔާރުވަމުންނެވެ. އަދި މި މައްސަލައިގައި އެ ކްލަބާ ދެކޮޅަށް އަޅާނެ ދަތިކުރުމުގެ ފިޔަވަޅުތަކެއް އަދި މިހާތަނަށް ރަސްމީކޮށް އިއުލާނެއް ނުކުރެއެވެ.
ބުދަ ދުވަހު ނޫސްވެރިންނާ ވާހަކަދައްކަމުން ޖަރުމަނުގެ ތަޖުރިބާކާރު ކޯޗު ކްލޮޕް ބުނީ، ”ގުދުރަތީ ގޮތުން ކަންތައްތައް ކުރިއަށް ދިޔަ ނަމަވެސް މާ ބޮޑަށް އެކަމުގައި ވިސްނާފައެއް ނުވޭ. ދުވަހަކުވެސް ސެލެބްރޭޓަރީ ޕެރޭޑެއް ބާއްވާނަމަ ބައިވެރިވުމާ ބެހޭ ގޮތުން ކުރިން ދެއްކި ވާހަކަތައް ވަރަށް ރަނގަޅަށް ހަނދާން އެބަހުރި،“ ކަމަށެވެ.
އޭނާ އިތުރަށް ފާހަގަކުރި ގޮތުގައި، ޕެޕް ގާޑިއޯލާއަށާއި، ދެ ޓީމުގެ ބައްދަލުވުންތަކުގެ އަހަރުތަކުގައި މެންޗެސްޓާ ސިޓީން ދެއްކި މޮޅު ފުޓްބޯޅައަށާއި، އެ ޓީމުން މެދުކެނޑުމެއްނެތި ދައްކާފައިވާ ޚާއްސަ މޮޅު ފެންވަރަށް އޭނާގެ ހިތުގައި އަބަދުވެސް ވަރަށް ބޮޑު އިހުތިރާމެއް އޮންނާނެ ކަމަށެވެ. އެހެންކަމުން، ސިޓީ އަތުން ތަށިތައް އަތުލުމަށް ޑިމާންޑް ކުރުމުގެ ވިސްނުމަކަށްވުރެ ބޮޑަށް އޭނާ އިސްކަންދެނީ ގާޑިއޯލާގެ ޓީމުން ދަނޑުމަތީގައި ހޯދި ކާމިޔާބީތަކަށް އިހުތިރާމް އަދާކުރުމަށެވެ.
އަރީން (އެޑީ)