އީރާނާއި އެމެރިކާއާ ދެމެދު އުފެދިފައިވާ އަސްކަރީ އަދި ވިޔަފާރީގެ ކުރިމަތިލުންތައް އިތުރަށް ވަރުގަދަވެ، މެދުއިރުމަތީގެ ސަރަހައްދުގައި ހަމަލާތައް ފުޅާވަމުންދާތީ، ދުނިޔޭގެ ބާޒާރަށް ހަކަތަ ފޯރުކޮށްދިނުމުގައި ހުރަސްތަކެއް އެޅިދާނެ ކަމުގެ ބިރު ބޮޑުވެ ތެލުގެ އަގު 100 ޑޮލަރާ ގާތްކޮށްފިއެވެ. މި ނުތަނަވަސްކަމާ ގުޅިގެން ބުދަ ދުވަހުގެ ވިޔަފާރީގެ ކުރީކޮޅު ތެލުގެ އަގު ގާތްގަނޑަކަށް ދެ ޑޮލަރަށް އުފުލި، ޖެހިޖެހިގެން ހަތަރު ވަނަ ސެޝަނުގައި ވެސް ވަނީ ބޮޑު ކުރިއެރުމެއް ހޯދާފައެވެ.
މިގޮތުން ބައިނަލްއަގުވާމީ ބާޒާރުގައި ބްރެންޓް ކްރޫޑް ފިއުޗަރސްގެ އަގު ޖީއެމްޓީން 07:15 ގައި 1.67 ޑޮލަރު (1.71 އިންސައްތަ) މައްޗަށް ގޮސް، ފީފާއެއްގެ އަގު ވަނީ 99.59 ޑޮލަރަށް އަރާފައެވެ. އަދި އެމެރިކާގެ ވެސްޓް ޓެކްސަސް އިންޓަރމީޑިއަޓް (ޑަބްލިޔުޓީއައި) ކްރޫޑްގެ އަގު 1.25 ޑޮލަރު (1.34 އިންސައްތަ) އުފުލި، ފީފާއެއްގެ އަގު ވަނީ 94.35 ޑޮލަރަށް އަރާފައެވެ. މިއާއެކު، ހަ މަސް ދުވަހުގެ ހަނގުރާމައަށް ދާއިމީ ހައްލެއް ލިބުމުގެ އުންމީދު ފަނޑުވެ، ހަމަލާތައް އަލުން ވަރުގަދަވުމުގެ ސަބަބުން އޮގަސްޓް މަހުގެ ކުރީކޮޅުން ފެށިގެން މިހާތަނަށް ބްރެންޓް ކްރޫޑްގެ އަގު މިވަނީ ޖުމްލަ 25 އިންސައްތަ މައްޗަށް ގޮސްފައެވެ.
މި ކުރިމަތިލުންތަކުގެ ތެރެއިން އީރާނުގެ ތެޔޮ ޓޭންކަރުތަކަށް އެމެރިކާއިން ދިން ހަމަލާތަކުގެ ބަދަލުހިފުމެއްގެ ގޮތުން، އީރާނުގެ ރިވޮލިއުޝަނަރީ ގާޑުން ވަނީ އެމެރިކާގެ ކަނޑުގެ ދެ ޑިސްޓްރޯޔަރަކަށާއި އުރުދުންގެ އަޒްރާގުގައި ހުންނަ އެމެރިކާގެ އަސްކަރީ މަރުކަޒަކަށް ބެލިސްޓިކް މިސައިލް ހަމަލާތަކެއް ދީފައެވެ. އުރުދުންގެ އަސްކަރިއްޔާއާ ހަވާލާދީ އެގައުމުގެ ނިއުސް އެޖެންސީން ރިޕޯޓްކޮށްފައިވާ ގޮތުގައި، ވައިގެ ދިފާއީ ނިޒާމުން ވަނީ ފޮނުވާލި 20 މިސައިލްގެ ތެރެއިން 18 މިސައިލް ވައްޓާލާފައެވެ. އަދި ބާކީ ދެ މިސައިލް ވެއްޓުނީ މީހުން ދިރިނޫޅޭ ފަޅު ސަރަހައްދުތަކަކަށް ކަމަށްވާތީ އެއްވެސް މީހަކަށް ގެއްލުމެއް ލިބިފައެއް ނުވެއެވެ.
އަނެއްކޮޅުން ވޮޝިންޓަނުން ދަނީ އީރާނުގެ ތެޔޮ ޓޭންކަރުތަކަށް އަމާޒުކޮށް ހަމަލާތައް ދިނުން ކުރިއަށް ގެންދާނެ ކަމުގެ އިންޒާރު ދެމުންނެވެ. އެމެރިކާގެ ޚާރިޖީ ވަޒީރު މާކޯ ރޫބިއޯ، ކޮލަމްބިއާއަށް ކުރެއްވި ދަތުރުފުޅެއްގައި ނޫސްވެރިންނާ ވާހަކަދައްކަވަމުން ވިދާޅުވީ، އެމެރިކާގެ ހަނގުރާމަމަތީ މަނަވަރުތަކަށް އީރާނުން ހަމަލާދޭން މަސައްކަތްކުރާ ކޮންމެ ފަހަރަކު ބަދަލުހިފުމުގެ ގޮތުން އީރާނުގެ ތެޔޮ ޓޭންކަރުތައް ނައްތާލާނެ ކަމަށެވެ. އެމެރިކާގެ ސެންޓްރަލް ކޮމާންޑުން ހާމަކުރި ގޮތުގައި، އެމެރިކާގެ މަނަވަރަކަށް ދިން މިސައިލް ހަމަލާތަކަކާ ގުޅިގެން ސެޕްޓެމްބަރު 8 ވަނަ ދުވަހު އީރާނުގެ ސާފުނުކުރާ ތެޔޮ އުފުލާ ފަސް ޓޭންކަރެއް ވަނީ ހަލާކުކޮށްލާފައެވެ.
މި ހަމަނުޖެހުންތައް ހިނގަމުންދާ ދަނޑިވަޅެއްގައި، އިރާގުން އަންނަނީ އޯޕެކް ޕްލަސް (OPEC+) ގެ ތެރެއިން އެގައުމަށް ތެޔޮ އުފެއްދުމަށް ކަނޑައަޅާފައިވާ ކޯޓާ އިތުރުކުރުމަށް މަސައްކަތް ކުރަމުންނެވެ. ބްލޫމްބާގުން ރިޕޯޓްކޮށްފައިވާ ގޮތުގައި ބަޣްދާދުން އެދެމުންދަނީ ދުވާލަކު 6 މިލިއަން ފީފާގެ ތެޔޮ އުފެއްދުމުގެ ހުއްދަ ދިނުމަށެވެ. އިރާގުގެ މި ހުށަހެޅުން އައިސްފައިވަނީ އޯޕެކް ޕްލަސްގެ ގައުމުތަކުން ތެޔޮ އުފެއްދުމުގެ ހަގީގީ ގާބިލުކަން އަލުން މުރާޖައާ ކުރަމުންދާ ވަގުތެއްގައެވެ.
އަރީން (އެޑީ)