އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އިން 2023 ވަނަ އަހަރު ކެތޮލިކް ”އަނިޔާވެރި ހަރުކަށި ފިކުރުގެ މީހުން“ ގެ ފަރާތުން ނުރައްކަލެއް ކުރިމަތިވެދާނެ ކަމަށް ބުނެ އިންޒާރުދީ މެމޯއެއް ތައްޔާރުކުރި މައްސަލައިގައި، އެކަމުގައި ބައިވެރިވި ބައެއް ތަހުލީލުވެރިން ވަޒީފާއިން ވަކިކޮށްފިއެވެ.
މި މައްސަލައިގައި ވަޒީފާއިން ވަކިކޮށްފައިވަނީ ހަތަރު އިންޓެލިޖެންސް އެނަލިސްޓުންނާއި ސުޕަވައިޒިން އެނަލިސްޓެއް ކަމަށް އެމީހުންގެ ވަކީލު ޑޭވިޑް ލޯމަން ހުކުރު ދުވަހު ވަނީ ވިދާޅުވެފައެވެ. ނަމަވެސް، މިކަމާ ގުޅޭގޮތުން އެފްބީއައި އިން ވަކި އެއްޗެއް ބުނަން ވަނީ ދެކޮޅު ހަދާފައެވެ.
މި މައްސަލައިގައި އޭރުގެ އެފްބީއައި ޑިރެކްޓަރު ކްރިސް ވްރޭ ވިދާޅުވީ، އެ ލިޔުމަކީ އެފްބީއައިގެ މިންގަނޑުތަކަށް ފެތޭ އެއްޗެއް ނޫން ކަމަށާއި، އެ ލިޔުން ވަނީ އަނބުރާ ގެންގޮސްފައެވެ. އަދި އެޓާނީ ޖެނެރަލް މެރިކް ގާލަންޑް ވެސް ވަނީ އެ މެމޯއާ މެދު ނުރުހުން ފާޅުކުރައްވާފައެވެ.
ޖަސްޓިސް ޑިޕާޓްމަންޓުން ކުރި ތަހުގީގުތަކުން ދެއްކި ގޮތުގައި، އެ ލިޔުން ތައްޔާރުކުރުމުގައި ތަހުލީލީ އުސޫލުތަކާ ޚިލާފުވެފައިވީ ނަމަވެސް، އެކަމުގައި ބައިވެރިވި މުވައްޒަފުން ގަސްތުގައި ގޯސްކޮށް އަމަލުކުރި ކަމުގެ ހެއްކެއް ފެނިފައެއް ނުވެއެވެ.
މި ވަޒީފާއިން ވަކިކުރުންތަކަކީ ރައީސް ޑޮނަލްޑް ޓްރަމްޕްގެ ސަރުކާރުގެ އެޖެންޑާއާ ނުގުޅޭ މުވައްޒަފުން ވަކިކުރުމުގެ ފުޅާ ކެމްޕޭނެއްގެ ބައެއް ކަމަށް ބެލެވެއެވެ. މީގެ ކުރިން ފެބްރުއަރީ މަހު ވެސް ޓްރަމްޕްގެ ސިއްރު ލިޔެކިޔުންތަކުގެ މައްސަލައިގައި ބައިވެރިވި އެޖެންޓުންތަކެއް ވަނީ ވަޒީފާއިން ވަކިކޮށްފައެވެ.
އެސޯސިއޭޓެޑް ޕްރެސްއިން ރިޕޯޓްކޮށްފައިވާ ގޮތުގައި، މި މެމޯގައި ”ރެޑިކަލް ޓްރެޑިޝަނަލިސްޓް ކެތޮލިކް“ ފިކުރާއި ނަސްލީ ހަރުކަށި ފިކުރުގެ މީހުންނާ ގުޅުމެއް އޮތްތޯ ބަލަން މަސައްކަތްކޮށްފައިވެއެވެ. ނަމަވެސް އެފްބީއައިގެ އެތެރޭގެ ތަހުގީގުން ދެއްކީ، އެކަށީގެންވާ ހެއްކެއް ނެތި ދީނީ ކަންކަމުގެ މައްޗަށް ބިނާކޮށް ތަހުގީގު ހިންގާފައިވާ ކަމަށް ދޭހަވާ ގޮތަށް އެ ލިޔުން ހުރި ކަމަށެވެ.
2024 ވަނަ އަހަރު ޖަސްޓިސް ޑިޕާޓްމަންޓުގެ އިންސްޕެކްޓަރު ޖެނެރަލް ނެރުއްވި ރިޕޯޓުގައި ވެސް ފާހަގަކޮށްފައިވަނީ، މިންގަނޑުތަކާ ޚިލާފު ކަންތައްތަކެއް ހުރި ނަމަވެސް ”ނުބައި ނިޔަތެއް“ އޮތް ކަމުގެ ހެއްކެއް ނެތް ކަމަށެވެ.
ނޫސްވެރިޔާ