އިނގިރޭސިން ނުކުމެ ހިޖުރަވެރިން ބާލަން ކުރާ ހަޅުތާލު އިތުރަށް ގެންދާނަމަ ޤާނޫނު އަރާ ހަމަކުރާނެ

ލަންޑަން (އޮގަސްޓް 7) – މުސްލިމުންނާއި އެކި ޤައުމުތަކުން ހިޖުރަކޮށްފައިވާ މީހުންނަށް އަނިޔާވެރި ނަސްލީ ތަފާތުކުރުންތަކެއް އުފައްދާ ނަމަ އެކަން ހުއްޓުވުމަށް އިނގިރޭސި ފުލުހުން ތައްޔާރުވެއްޖެ އެވެ. އިނގިރޭސިވިލާތުގެ ހުޅަނގު އުތުރުގެ ސައުތުޕޯޓުގައި ވަޅިން ހަމަލާދީ ތިން އަންހެން ކުދިން މަރުވުމުން މިދިޔަ ހަފްތާގެ ކުރީކޮޅު އިނގިރޭސިވިލާތުގައި އުފެދުނު އަނިޔާވެރިކަން ބޮޑުވެ، އޮންލައިންކޮށް ދޮގު މެސެޖުތަކުގެ ރާޅެއް އުފެދިގެންދިޔައެވެ.  ޝައްކު ކުރެވޭ ގާތިލަކީ އިސްލާމިސްޓް ހިޖުރަވެރިއެއް ކަމަށް ގޯސްކޮށް ބުނެ ޚަބަރު ފަތުރާ މީސްތަކުންމެދުގައި ނުތަނަވަސްކަން އިތުރު ކުރުމުގެ ނަތީޖާއަކަށް ވެގެންދިޔައީ ބޮޑު ހަމަނުޖެހުންތަކަކާއި ދިމާއަށް މުޅިޤައުމު މިސްރާބުޖެހުމެވެ.  

ބުދަ ދުވަހު މަގުމައްޗަށް ނުކުމެފައިވާ އިނގިރޭސި ވަތަނީ މީހުންތަކާއި، ފަހަތަށް ޖެހިފައިވާ ޖަމާއަތްތަކުން ސްޕެޝަލިސްޓް އިމިގްރޭޝަން ލޯ ފާމްތަކަށާއި މައިގްރެންޓް ސަޕޯޓް ސެންޓަރުތަކަށް އަމާޒުކުރާނެ ކަމަށް ރިޕޯޓްތައް ބުނާއިރު ގިނަ ބަޔަކު ބަންދުކުރަން މަޖުބޫރުވެފައިވާއިރު އެކަމަށް އެއްވެސް ޢަމަލީ ސިފައެއް އިނގިރޭސި ދިފާޢީބާރުތަކާއި ފުލުހުން އެއްވެސް ކަމެއް ކުރާތަނެއް މިހާތަނަށް ނުފެންނަކަމަށް ޙަބަރުތަކުން ބުނަމުންދެއެވެ. މުޒާހަރާތަކުގެ އަސަރު ކުރި ސަރަހައްދުތަކުގެ ބައެއް ފެމިލީ ޑޮކްޓަރުން ބުނަމުންދަނީ މުވައްޒަފުން ހިމާޔަތް ކުރުމަށް އަވަހަށް ޚިދުމަތްދޭ ތަންތަންވެސް ބަންދު ކުރާނެކަމަށެވެ.

އެންޓި ރޭސިޒަމް އަދި އެންޓި ފަޝީސްޓް ޖަމާއަތްތަކުން ވަނީ މުޅި އިނގިރޭސިވިލާތުގައި ކައުންޓަރ ޕްރޮޓެސްޓްތައް އިންތިޒާމްކޮށްގެން ރައްދުދީފައެވެ

ޖުލައި ހަތަރެއްގައި ބޭއްވި އިންތިހާބު ކާމިޔާބު ކުރެއްވުމަށް ފަހު ފުރަތަމަ ދަތިކަމާ ކުރިމަތިލާން ޖެހިފައިވާ ކުރީގެ ޗީފް ޕްރޮސެކިއުޓަރު ބޮޑުވަޒީރު ކޭއާ ސްޓާމަރ ވަނީ އިނގިރޭސިވިލާތުގައި 13 އަހަރު ތެރޭގައި ފެތުރިފައިވާ އެންމެ ގޯސް އަނިޔާވެރިކަން ނައްތާލުމަށް މަސައްކަތް ކުރަމުންދާއިރު، ހަމަނުޖެހުން ހިންގާ މީހުންނަށް ދިގު ޖަލު ހުކުމެއް އަންނާނެ ކަމަށް އިންޒާރު ދެއްވާފަ އެވެ

ހަމަނުޖެހުން ފެށި ފަހުން އިއްވި ފުރަތަމަ ހުކުމްތަކުގައި 58 އަހަރުގެ ފިރިހެނަކު އަނިޔާވެރި އަމަލުހިނގުމުގެ ކުށުގައި ތިން އަހަރަށް ޖަލަށްލާފައިވާއިރު، އުމުރުން 41 އަހަރާއި 29 އަހަރުގެ އިތުރު ދެ މީހެއްގެ މައްޗަށް ވަނީ 20 މަހާއި 30 މަހަށް ހުކުމްކޮށްފަ އެވެ

”މިއީ އަޅުގަނޑުމެން އަޅަމުންދާ އަވަސް ފިޔަވަޅެއް. އަޅުގަނޑުމެންގެ މަގުތަކުގައި ނުވަތަ އޮންލައިންކޮށް އަނިޔާވެރި ހަމަނުޖެހުން އުފައްދާނަމަ ގާނޫނުގެ ފުރިހަމަ ބާރާއި ކުރިމަތިލާން ޖެހޭނެ،“ ސްޓާމަރ ވިދާޅުވި އެވެ

ސަތޭކަވަރަކަށް އިނގިރޭސި ދޮންނަސްލުގެ ފިރިހެނުން ހިމެނޭ ގްރޫޕްތަކެއް ފުލުހުންނާ ކުރިމަތިލައި، އެފްރިކާ، އޭޝިއާ އަދި މެދުއިރުމަތިން ހިޖުރަކުރާ މީހުން ހިމާޔަތް ހޯދާ އަދި އެމީހުން ހޮޓަލްތަކުގެ ކުޑަދޮރުތައް ތަޅާލައި، ”އެމީހުން ބޭރަށް ނެރޭ“ އަދި ”އައުން ހުއްޓުވާ“ ކަމަށް ގޮވާލުމުން ހަމަނުޖެހުންތައް އުފައްދަމުންދިޔައެވެ.

އަދި މިސްކިތްތަކަށް ހިލަ އުކައި، ހަދަމުންދާތީ  މުސްލިމް ޖަމިއްޔާތަކުން ވަނީ ކޮމިއުނިޓީ ސޭފްޓީ އެޑްވައިސް ވެސް ނެރެފަ އެވެ. ނާމާންކަމާއި އެކު ސިއްސުވާލާފަދަ މަންޒަރުތަކުން ގިނަ މުސްލިމުންނާއި މައިނޯރިޓީ ނަސްލީ ޖަމާއަތްތަކުން ”ވަނީ ބިރުވެރިކަމެއްގެ ތެރޭގައި ކަމަށް“ ލަންޑަންގެ މޭޔަރު ސާދިގް ހާން ވިދާޅުވި އެވެ.

ކުރިމަތިލުންތައް

އިނގިރޭސިވިލާތަށް ހިޖުރަކުރުމަކީ،  2016 ވަނަ އަހަރު ޔޫރަޕިއަން ޔޫނިއަންއިން ވަކިވުމަށް އެގައުމުން ދިން ވޯޓުގައި ބޮޑު ސަބަބެއް ކަމަށާއި މިދިޔަ މަހުގެ އިންތިޚާބުގައި އެއީ ހަނގުރާމައިގެ މައިދާނެއް ކަމަށް ވެސް ވިދާޅުވި އެވެ.

އިނގިރޭސިވިލާތުގައި 2022 ވަނަ އަހަރު ރެކޯޑް މިންވަރަކަށް މައިގްރޭޝަން ލެވެލްއެއް ފެނިފައިވާއިރު، ޔޫކްރޭނާއި ހޮންކޮންގުން އަންނަ މީހުންގެ އަދަދު އިތުރުވެ، ވޯކް އަދި ސްޓޫޑެންޓް ވިސާ މެދުވެރިކޮށް ވެސް އެ އަދަދު އިތުރުވެފައިވެ އެވެ.

ގާނޫނީ ވަސީލަތްތަކުގެ ތެރެއިން ސާފު ހިޖުރަކުރި މީހުންގެ އަދަދު 2023 ވަނަ އަހަރު ގާތްގަނޑަކަށް 685،000 އަށް އަރާފައިވާއިރު، ހުއްދަ ނެތި އިނގިރޭސި އައްސޭރިފަށަށް ކުދި ޑިންގީތަކުން 29،000 މީހުން އައިސްފައިވާއިރު، ގިނަ ބަޔަކު ވަނީ ހަނގުރާމަވެރި ސަރަހައްދުތަކުން ފިލައިގެން ގޮސްފައެވެ. ”އުޅަނދުތައް ހުއްޓުވާ“ މިގޮތަށް ހަމަނުޖެހުންތަކުގައި އިވުނު ޝުއޫރަކީ ވެސް އިންތިހާބުގައި 14 އަހަރު ހޭދަކުރުމަށް ފަހު ކޮންޒަވޭޓިވް ޕާޓީގެ ވެރިކަމުން ދުރުކުރުމުގެ ކުރިން އެ ޕާޓީގެ ޝިއާރުއެކެވެ.

ލަންޑަންގެ އިރުއުތުރުގެ ވޯލްތަމް ފޮރެސްޓް އިމިގްރޭޝަން ބިއުރޯގެ ބޯޑު ޖަހާފައިވާ ފިހާރަ ކުރިމަތީގައި ހިނގާފައި ދިޔައިރު، ލިއުންތައް އަމާޒު ކުރެވިފައިވާ ގޮތާއި ބެހޭގޮތުން ވާހަކަދައްކަމުން  އެހިސާބުގައި ދިރިއުޅޭ އުމުރުން 40 އަހަރުގެ ކަޅު ނަސްލުގެ އަންހެނަކު ކްލާރިސާ ރޫޖިއާ ބުނީ އޭނާއަށް ރައްކާތެރިކަން ނެތް ކަމަށާއި ބިރުވެރިކަން އިހުސާސް ކުރެވޭ ކަމަށެވެ.  ހަމުގެ ކުލައަށް ބަލާފައި ހަމަލާ އަމާޒުވެފައި ހުންނަކަން އިހްސާސް ކުރެވޭ ކަމަށެވެ. 

”އެމީހުންނަށް ނޭނގޭ ކަމަކީ އަހަރެމެން މިތަނަށް ގެނައީ މި ގައުމު ބިނާކުރަން… އަހަރެމެން ބިނާކުރި އަހަރެމެންގެ އަސްލު މިތަނުގައި މިހުންނަނީ،“ ފެންނަ ފެނުމުގައި ކަންބޮޑުވެފައިވާ ރޫޖިއާ ބުންޏެވެ. ”އެއީ އަހަރެންގެ ހިތް ފަޅައިގެންދާ ކަމެއް… އެކަމުން އަހަރެން ދެރަވާ ކަމެއް.“

ސަރުކާރުން ވަނީ އަނިޔާވެރިކަން ފެތުރިއްޖެނަމަ ރައްދު ދިނުމަށް 6،000 ސްޕެޝަލިސްޓް ފުލުހުންގެ ”ސްޓޭންޑިން އާމީ“ އެއް އެކުލަވާލައި، އެއްވެސް ހަމަނުޖެހުމަކާ ކުރިމަތިލާން ފުދޭވަރުގެ ބޮޑު ޕްރެޒެންސެއް ލިބޭނެ ކަމަށް ބުނެފަ އެވެ.

ލަންޑަންގެ ޕޮލިސް ޗީފް މާކް ރޯލީ ވިދާޅުވީ ފުލުހުންގެ ޕްލޭންތައް ބިނާވެފައި އޮތީ އަމާޒުވެދާނެ މުޒާހަރާ ހަމަނުޖެހުންތަކުގެ މައްޗަށް ކަމަށާއި ނަމަވެސް އެމީހުން ފަރިތަވެ އެހެން ހާދިސާތަކަށް ވެސް ތައްޔާރުވާނެ ކަމަށެވެ.

”އެހެންވެ މިރޭ އަޅުގަނޑުމެންނަށް އެތައް ހާސް އޮފިސަރުންނެއް ތިބީ. އެ މީހުން ހިމާޔަތް ކުރާނަން،“ ނޫސްވެރިންނާ ވާހަކަ ދައްކަވަމުން އޭނާ ވިދާޅުވި އެވެ.

ޕަބްލިކް ޕްރޮސިކިއުޝަންގެ ޑިރެކްޓަރު ސްޓީވަން ޕާކިންސަން ވިދާޅުވީ 11 އަހަރުގެ ކުޑަކުދިން ވެސް މި އަނިޔާވެރި ހަމަނުޖެހުމުގައި ބައިވެރިވެފައިވާ ކަމަށާއި ”އެމީހުންގެ އަމަލުތަކުގެ ސަބަބުން މުޅި އުމުރަށް ވެސް ނަތީޖާ ކުރިމަތިވެދާނެ“ ކަމަށެވެ. ނޭޝަނަލް ޕޮލިސް ޗީފްސްގެ މަޖިލީހުން ބުނީ މި ހަމަނުޖެހުމާ ގުޅިގެން 120 އަށް ވުރެ ގިނަ މީހުންގެ މައްޗަށް ދައުވާކޮށް 428 މީހަކު ހައްޔަރުކޮށްފައިވާ ކަމަށެވެ.