”ލިބަޓޭ، އެގަލިޓޭ، އެމްބާޕޭ.“ މިއީ ފަރަންސޭސިވިލާތުގެ ގައުމީ ޝިއާރު ކަމަށްވާ ”ލިބަޓޭ، އެގަލިޓޭ، ފްރަޓާނިޓޭ“ (މިނިވަންކަން، ހަމަހަމަކަން، އުޚުއްވަތްތެރިކަން) އަށް ބަދަލު ގެނެސް، އެ ގައުމުގެ ގިނަ ބަޔަކު މިހާރު ބޭނުންކުރަމުން އަންނަ ބަހެކެވެ. ކިލިއަން އެމްބާޕޭ ފްރާންސަށް ކޮށްދިން ފަދައިން ގައުމެއްގެ ހިތްތަކާއި ތަސައްވުރުތައް އަތުލައިގަނެވޭނީ ވަރަށް މަދު އެތުލީޓުންނަކަށެވެ. ހަގީގަތުގައި ގިނަ ބަޔަކު ވަނީ އެ މީހުންގެ އެންމެ އުޖާލާ ތަރި ދެކެ ލޯބިވާކަން ހާމަ ކުރުމުގެ ގޮތުން އެ ގައުމުގެ ޝިއާރު ރީބްރޭންޑްކޮށް، އޭނާގެ ނަން އެ ޝިއާރުގައި ހިމަނާފައެވެ.
ކިލިއަން އެމްބާޕޭ އުފަންވީ 1998 ވަނަ އަހަރުގެ ޑިސެމްބަރު މަހު ޕެރިހުގެ ބޮންޑީ އަށެވެ. ކިލިއަންގެ ފުޓްބޯޅައިގެ ހުނަރު ވަރަށް ކުޑައިރުއްސުރެ ފެނިގެން ދިޔަ އިރު، އޭނާ ވަނީ ޒުވާން ހުނަރުވެރި ކުޅުންތެރިއެއްގެ ގޮތުގައި މަޝްހޫރުވެފައެވެ. އޭނާގެ ފުޓްބޯޅައިގެ ބިންގާ އެޅުނީ އޭނާގެ އުފަން ރަށް ކަމަށްވާ ބޮންޑީގެ ކްލަބް، އޭއެސް ބޮންޑީ އިންނެވެ. އެ ހިސާބުން ފެށިގެން އޭނާގެ ކުރިއެރުން ހުއްޓުމެއް ނެތި ކުރިއަށް ގޮސް، އުމުރުން އެންމެ 16 އަހަރުގައި ޕްރޮފެޝަނަލް ކެރިއަރު ވަނީ ފަށާފައެވެ.
އެމްބާޕޭގެ ފުޓްބޯޅައިގެ ހަޔާތުގައި އެންމެ ފާހަގަކޮށްލެވޭ އެއް ކުރިއެރުމަކީ ފްރާންސްގެ އޭއެސް މޮނާކޯއާ ގުޅުމެވެ. މޮނާކޯގެ ޖާޒީގައި އޭނާ ދެއްކި ކުޅުމަކީ މުޅި ދުނިޔޭގެ ސަމާލުކަން އޭނާއަށް ހުއްޓުވާލި ކަމެކެވެ. 2017 ވަނަ އަހަރު މޮނާކޯ އިން ފަރަންސޭސި ލީގު (ލީގް 1) ކާމިޔާބުކޮށް، ޔުއެފާ ޗެމްޕިއަންސް ލީގުގެ ސެމީ ފައިނަލަށް ދަތުރު ކުރުމުގައި އެމްބާޕޭ ވަނީ މުހިންމު ދައުރެއް އަދާކޮށްފައެވެ. އޭނާގެ ބާރު ސްޕީޑާއި، ހުޝިޔާރުކަމާއި، ގޯލް ޖެހުމުގެ ތޫނުފިލި ގާބިލްކަން ވެގެންދިޔައީ އިދިކޮޅު ޓީމުތަކުގެ ޑިފެންޑަރުންނަށް އޮތް ބޮޑު ބިރަކަށެވެ.
ކިލިއަން އެމްބާޕޭއަކީ ހަމައެކަނި ހުނަރުވެރި ކުޅުންތެރިއެއް ނޫނެވެ. އޭނާއަކީ ޒުވާން ކުޅުންތެރިންނަށް ހުރި ނަމޫނާއެކެވެ. ކުޑަ ދުވަސްކޮޅެއްގެ ތެރޭގައި އޭނާ ހޯދި ކާމިޔާބީތަކަކީ އޭނާގެ ބުރަ މަސައްކަތާއި ކުޅިވަރަށް އޮތް ލޯތްބެއްގެ ނަތީޖާއެވެ. މިއަދު އޭނާއަކީ ފަރަންސޭސިވިލާތުގެ ފަޚުރެވެ. އަދި ދުނިޔޭގެ ފުޓްބޯޅައިގެ ރަސްގެފާނުގެ ތަޚުތަށް ވާދަކުރާނެ އެންމެ ވަރުގަދަ އެއް ތަރިއެވެ.
ނޫސްވެރިޔާ