ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ، 2026 ވަނަ އަހަރުގެ ވޯލްޑް ކަޕަށްފަހު އޭނާގެ ފާހަގަކޮށްލެވިގެންވާ ކެރިއަރު ނިމުމަކަށް ގެންނަން ނިންމައިފިއެވެ.
އުމުރުން 40 އަހަރުގެ ރޮނާލްޑޯ ސީއެންއެން އަށް ދިން އިންޓަވިއުއެއްގައި ބުނީ، އެމެރިކާ، ކެނެޑާ އަދި މެކްސިކޯ ގުޅިގެން ބާއްވާ 2026 ވަނަ އަހަރުގެ ވޯލްޑް ކަޕަކީ އޭނާ ފެނިގެންދާނެ ފަހު ބޮޑު މުބާރާތަށް ވާނެ ކަމަށެވެ. ”ތެދުތެދަށް ބުނަންޏާ ވަރަށް އަވަހަށް، އެއް އަހަރު ނުވަތަ ދެ އަހަރު ތެރޭގައި އަހަރެން ކުޅުން ހުއްޓާލާނަން. މިދިޔަ 25 އަހަރު އަހަރެން މި ހުރީ މި ކުޅިވަރުގެ ތެރޭގައި، އަހަރެން ހުރިހާ ކަމެއް ކޮށްފިން،“ ރޮނާލްޑޯ ބުންޏެވެ.
ޕޯޗުގަލްގެ ގައުމީ ޓީމަށް ވޯލްޑް ކަޕްގެ ޖާގައެއް ކަށަވަރު ކުރެވިއްޖެ ނަމަ، ރޮނާލްޑޯ ވެގެންދާނީ ފުޓްބޯޅައިގެ ތާރީޚުގައިވެސް ހަ ވޯލްޑް ކަޕެއްގައި ވާދަކުރާ ފުރަތަމަ ފިރިހެން ކުޅުންތެރިޔާއަށެވެ.
ކްރިސްޓިއާނޯ ރޮނާލްޑޯ އަކީ ކާކު؟
ކްރިސްޓިއާނޯ ރޮނާލްޑޯ އަކީ ފަސް ފަހަރު ބެލޮން ޑި އޯރް ކާމިޔާބުކޮށް، ރަސްމީ މެޗުތަކުގައި 900 އަށްވުރެ ގިނަ ލަނޑު ޖެހި ފުރަތަމަ ކުޅުންތެރިޔާއެވެ. އޭނާގެ ކެރިއަރުގެ ކުރީކޮޅު ސްޕޯޓިން ޕޯޗުގަލް އިން ފާހަގަވެ، 2003 ވަނަ އަހަރު މެންޗެސްޓާ ޔުނައިޓެޑާ ގުޅުނެވެ. އޭގެ ފަހުން ރެއާލް މެޑްރިޑާއި ޔުވެންޓަސްގައި ކާމިޔާބު ދުވަސްތަކެއް ހޭދަކުރުމަށްފަހު، މިހާރު ކުޅެމުންދަނީ ސައުދީ އަރަބިއްޔާގެ އަލް ނަސްރު އަށެވެ. ރޮނާލްޑޯ ވަނީ 2016 ވަނަ އަހަރު ޕޯޗުގަލް އަށް ޔޫރޯ ޗެމްޕިއަންޝިޕް ކާމިޔާބުކޮށްދީފައެވެ.
ޅަފަތުގެ ދިރިއުޅުން
1985 ވަނަ އަހަރު ޕޯޗުގަލްގެ މަރީއާ އަށް އުފަންވި ރޮނާލްޑޯ ބޮޑުވީ މަސައްކަތްތެރިން ދިރިއުޅޭ ނިކަމެތި އަވަށެއްގައެވެ. އޭނާގެ ބައްޕަ ހޯސޭ ޑިނިސް އަވޭރޯ އަކީ މަސްތުވާތަކެއްޗާއި ބަލީގެ ޝިކާރައަކަށްވެފައިވާ މީހަކަށްވީ ނަމަވެސް، ރޮނާލްޑޯ ފުޓްބޯޅައަށް ތައާރަފްވީ ބައްޕަގެ ފަރާތުންނެވެ. އުމުރުން އެންމެ 10 އަހަރުގައިވެސް ރޮނާލްޑޯ ފާހަގަވެފައިވަނީ ފުޓްބޯޅައަށް މަރުދޭ ކުއްޖެއްގެ ގޮތުގައެވެ.
ކެރިއަރުގެ ކާމިޔާބީތައް
މެންޗެސްޓާ ޔުނައިޓެޑާއެކު ޕްރިމިއާ ލީގާއި ޗެމްޕިއަންސް ލީގު ކާމިޔާބުކުރުމަށްފަހު، ރެއާލް މެޑްރިޑުގައި އޭނާ ވަނީ ދުނިޔޭގެ ރެކޯޑްތައް މުގުރާލާފައެވެ. ރެއާލްގައި ހޭދަކުރި އަހަރުތަކަކީ އޭނާގެ ކެރިއަރުގެ އެންމެ އުފާވެރި ދުވަސްތައް ކަމަށް ރޮނާލްޑޯ ސިފަކުރެއެވެ.
މިހާރު ސައުދީގެ އަލް ނަސްރުގައި ކުޅެމުންދާ ރޮނާލްޑޯގެ އާމްދަނީ އަހަރަކު 200 މިލިއަން ޑޮލަރަށް އަރާއިރު، އޭނާ އަކީ ދުނިޔޭގައި އެންމެ ބޮޑު މުސާރަލިބޭ އެތުލީޓެވެ. އޭނާގެ ޖުމްލަ މިލްކިއްޔާތު 1.2 ބިލިއަން ޑޮލަރަށްވުރެ ގިނަކަމަށް ތަފާސްހިސާބުތަކުން ދައްކައެވެ.
ރޮނާލްޑޯ ބުނި ގޮތުގައި އޭނާގެ އުންމީދަކީ 2026 ވަނަ އަހަރުގެ ވޯލްޑް ކަޕްގައި ވާދަކޮށް، ޕޯޗުގަލްގެ ގައުމީ ޓީމަށް އިތުރު ކާމިޔާބީއެއް ހޯދައިދިނުމަށްފަހު ކުޅުން ހުއްޓާލުމެވެ.
ހަސަން އަރީން (އެޑީ)