ޖިއްދާގައި ހަށިގަނޑަށް ޝިފާ ދިން ދިވެހި މީހާގެ ނަފްސު ޝިފާ ލިބުނީ މައްކާގައި

އިސްލާމީ ދީނުގެ މުޤައްދަސް ބިނާ، ކަޢުބަތުﷲ ގެފުޅު ހުންނަ މައްކާއާއި، އެ ސިޓީގެ ދޮރާށީގެ ގޮތުގައި ބެލެވޭ ޖިއްދާއަކީ ތާރީޚީ ގޮތުން އެތައް ބައެއްގެ ދިރިއުޅުން ބަދަލުކޮށްލާފައިވާ މުހިންމު ބިމެކެވެ. މީގެ ތެރެއިން އެންމެ ފާހަގަކޮށްލެވޭ އެއް ބަޔޮގްރަފީއަކީ، ޑަޗް ފިޒިޝަން ޑރ. ވެން ޑަރ ހޫގް ނުވަތަ ފަހުން އިސްލާމްދީނަށް ބަދަލުވުމަށްފަހު މުޙައްމަދު ޢަބްދުލް އަލީގެ ނަމުން މަޝްހޫރުވި ޑޮކްޓަރުގެ ޙަޔާތެވެ.

މިއީ ހަމައެކަނި ހިޖާޒު ކަރައިގައި މަސައްކަތް ކުރި ޔޫރަޕްގެ ޑޮކްޓަރެއްގެ ވާހަކައެއް ނޫނެވެ. މިއީ އިސްތިޢުމާރީ ބޭސްވެރިކަމާއި، ބެކްޓީރިއޮލޮޖީގެ ޢިލްމީ ދިރާސާތަކާއި، ޙައްޖާއި މައްކާއާ ގުޅުންހުރި ރޫޙާނީ ތަޖުރިބާގެ ތެރެއިން އިންސާނެއްގެ އައިޑެންޓިޓީ ބަދަލުވި ގޮތުގެ ވާހަކައެވެ.

ލައިޑަން އިން ފެށިގެން ކޮލޮނީތަކާ ހަމައަށް…

1888 ވަނަ އަހަރު ޑަޗް އަސްކަރީ އާއިލާއަކަށް އުފަންވި ވެން ޑަރ ހޫގް ތައުލީމު ހާސިލް ކުރެއްވީ ނެދަލެންޑްސްގެ މަޝްހޫރު ލައިޑަން ޔުނިވާސިޓީންނެވެ. އޭނާގެ ބައްޕަ، އަސްކަރީ ޖެނެރަލް، އޭނާ އަސްކަރީ މަގަކަށް ކޮއްޕާލަން މަސައްކަތް ކުރި ނަމަވެސް، ވެން ޑަރ ހޫގް އިޚްތިޔާރު ކުރެއްވީ އިސްތިޢުމާރީ ބޭސްވެރިކަމުގެ ދާއިރާއެވެ.

20 ވަނަ ގަރުނުގެ ކުރީކޮޅު ޑަޗް އީސްޓް އިންޑީސް (މިހާރުގެ އިންޑޮނޭޝިއާ) ގައި މަސައްކަތް ކުރިއިރު، އޭނާ ވަނީ އިސްތިޢުމާރީ ނިޒާމުގެ ހަރުކަށިކަމާ ދެކޮޅަށް ފާޑުކިޔައި، އެ ސަރަހައްދުގެ އިސްލާމީ މުޖުތަމަޢުތަކަށް އަހުލުވެރިވެފައެވެ.

މެޑިސިން އާއި ރޫޙާނީ ދަތުރު

1922 ވަނަ އަހަރު ޖިންސީ ބަލިތަކުގެ ދާއިރާއިން ޑޮކްޓަރުގެ ޑިގްރީ ހާސިލް ކުރެއްވި ނަމަވެސް، ޒަމާނީ ސައިންސާއި ދީނުގެ ރޫޙާނީ މާނައާ ދެމެދު އޭނާގެ ހިތުގައި އުފެދުނު ސުވާލުތަކަށް ޖަވާބެއް ނުލިބުނެވެ. 1928 ވަނަ އަހަރު ހިޖާޒުގައި ޑޮކްޓަރެއްގެ ގޮތުގައި މަސައްކަތް ކުރުމަށް ލިބުނު ފުރުޞަތަކީ އޭނާގެ ދިރިއުޅުމުގެ ބޮޑު ބަދަލެވެ.

ޖިއްދާއާއި ހައްޖު މޫސުމުގެ ގޮންޖެހުންތައް

ޖިއްދާއަށް ވަޑައިގަތުމުން އޭނާއަށް ކުރިމަތިލާން ޖެހުނީ ނުހަނު އުނދަގޫ ސިއްހީ ހާލަތަކާއެވެ. އެތައް ހާސް ހައްޖާޖީންނެއް އައުމުގެ ސަބަބުން ބަލިތައް ފެތުރެމުން ދިޔައިރު، ހޮސްޕިޓަލްތަކުގައި އަސާސީ ވަސީލަތްތައް ނެތެވެ. 1927 ވަނަ އަހަރު ސައުދީ ސަރުކާރުން އެދިގެން، ބެކްޓީރިއޮލޮޖިސްޓެއްގެ ގޮތުގައި އޭނާ ކުރި މަސައްކަތުގެ ތެރެއިން، ހަށިގަނޑަށް ފަރުވާ ދެމުންދިޔަ ޑޮކްޓަރުގެ ހިތުގައި އީމާންތެރިކަމުގެ ޝުޢޫރުތައް އުފެދެން ފެށިއެވެ.

އިސްލާމްވުމާއި ޙައްޖުގެ މަތިވެރި ތަޖުރިބާ

ޖިއްދާގައި ހުންނަވައި، މުޙައްމަދު ޢަބްދުލްޢަލީގެ ނަން އިޚްތިޔާރު ކުރައްވައި އިސްލާމްވިކަން އިޢުލާން ކުރެއްވުމުން ޔޫރަޕްގައި ބޮޑެތި ފާޑުކިޔުންތަކެއް އަމާޒުވިއެވެ. ނަމަވެސް އޭނާ ބާރުއަޅުއްވަމުން ގެންދެވީ މިއީ ހަގީގީ ރޫޙާނީ ބަދަލެއް ކަމެވެ.

1935 ވަނަ އަހަރު ޙައްޖުގެ މަތިވެރި އަޅުކަން އަދާކުރެއްވުމަށް މައްކާއަށް ކުރެއްވި ދަތުރުފުޅަކީ އޭނާގެ ހަޔާތުގެ އެންމެ މުހިންމު ބާބެވެ. ޢަރަފާތު ބިމުގައި ހުންނެވި ވަގުތު، މުއްސަނދިންނާއި ފަޤީރުން، އަދި އެކި ނަސްލުތަކުގެ މީހުން އެއް ސަފެއްގައި ތިބި މަންޒަރުން އޭނާއަށް އިންސާނީ އެއްބައިވަންތަކަމުގެ ހަގީގީ މާނަ އިހުސާސް ކުރެވުނެވެ.

ދެ ދުނިޔޭގެ މެދުގައިވާ ޝަޚްސިއްޔަތެއް

ވެން ޑަރ ހޫގްގެ ދިރިއުޅުމަކީ ޔޫރަޕްގެ ޒަމާނީ ސައިންސާއި، އިސްލާމްދީނުގެ ރޫޙާނީ މަރުކަޒު ކަމަށްވާ މައްކާއާ ދެމެދު އުފެދުނު ވަރުގަދަ ގުޅުމެކެވެ. އޭނާއަކީ ލެބޯޓްރީގެ ދިރާސާތަކާއި، ދީނީ އަޅުކަންތަކުގެ ތެރޭގައި އަމިއްލަ އައިޑެންޓިޓީ ހޯދި މީހެކެވެ. ޖިއްދާގައި މީހުންގެ ހަށިގަނޑަށް ޝިފާ ދިނުމުގެ މަސައްކަތުގައި އުޅުއްވި ނަމަވެސް، އޭނާގެ އަމިއްލަ ނަފްސަށް ހަގީގީ ޝިފާއެއް ލިބުނީ މައްކާގެ ބިމުންނެވެ.

މި ލިޔުމުގައި ފާޅުކޮށްފައިވާ ޚިޔާލުތަކަކީ ކޮންމެހެން އަލްޖަޒީރާ ނެޓްވޯކްގެ އެޑިޓޯރިއަލް މަޤާމު ދައްކުވައިދޭ ޚިޔާލުތަކެއް ނޫނެވެ.