އިސްރާއީލުގެ އަސްދޫދު ސިޓީގައި ހުރި ކަނޑުގެ ސިފައިންގެ މަރުކަޒަކަށް ހިޒްބުﷲ އިން ހަމަލާދީފިއެވެ. މި ހަމަލާގައި އެންމެ ފަހުގެ ހަތިޔާރު ބޭނުންކޮށްފައިވާ ކަމަށް ހިޒްބުﷲ އިން ބުނެފައިވެއެވެ.
މި ހަމަލާއާ ގުޅިގެން:
– އިސްރާއީލުގެ މެދުތެރެއާއި އުތުރުގެ ސަރަހައްދުތަކުގައި ވައިގެ ހަމަލާތަކުގެ އަޑު އިވިފައިވެއެވެ.
– ލުބުނާނުން 340 މިސައިލް ފޮނުވާލާފައިވާ ކަމަށް އިސްރާއީލު ސިފައިންގެ ރޭޑިއޯއިން ރިޕޯޓުކޮށްފައިވެއެވެ.
– މި ހަމަލާތަކުގައި 11 މީހަކު ޒަޚަމްވެފައިވާ ކަމަށް މެޑިކަލް އެޖެންސީތަކުން ބުނެފައިވެއެވެ.
ހިޒްބުﷲ އިން މި ހަމަލާ ދީފައިވަނީ ލުބުނާނުގެ ވެރިރަށް ބެއިރޫތުގެ މެދުތެރެއަށް އިސްރާއީލުން ދިން ހަމަލާއެއްގައި 29 މީހުން މަރުވިތާ އެއް ދުވަސް ފަހުންނެވެ.
ލުބުނާނުގެ ބޮޑުވަޒީރު ނަޖީބް މިކާޓީ ވަނީ އިސްރާއީލުގެ ހަމަލާ ކުށްވެރިކުރައްވާފައެވެ. އަދި ޔޫރަޕިއަން ޔޫނިއަންގެ އެންމެ އިސް ޑިޕްލޮމެޓް ވަނީ ދެފަރާތުން ވެސް ހަނގުރާމަ ހުއްޓާލުމުގެ އެއްބަސްވުމަކަށް އައުމަށް ގޮވާލާފައެވެ.
އިސްރާއީލުން ދިން ހަމަލާތަކުގައި ލުބުނާނުގައި 3،500 އަށް ވުރެ ގިނަ މީހުން މަރުވެފައިވާއިރު، ގާތްގަނޑަކަށް 1.2 މިލިއަން މީހުން ވަނީ ގެދޮރު ދޫކޮށް ގޮސްފައެވެ.