އެސްއެސްޓީވީ އާއި މޯލްޑިވްސް މިޔުޒިކް އެންޑް އާޓްސް ސެންޓަރު (އެމްއެމްއޭސީ) ގުޅިގެން ގެނެސްދޭ މަދަހަ ރަން އަޑު މުބާރާތުގެ ހަވަނަ ސީޒަންގައި ބައިވެރިވުމުގެ ފުރުސަތު ހުޅުވާލައިފިއެވެ. މި މުބާރާތަކީ 2020 ވަނަ އަހަރުން ފެށިގެން އެމްއެމްއޭސީއިން ބާއްވަމުން އަންނަ ސިލްސިލާ މަދަހަ މުބާރާތެކެވެ.
މިއަހަރުގެ މުބާރާތުގައި ބައިވެރިވުމުގެ މުއްދަތު ހަމަވާނީ އަންނަ މަހުގެ 15 ވަނަ ދުވަހަށެވެ. މުބާރާތުގައި ވާދަ ކުރާ އުމުރުފުރާތަކުގެ ތެރޭގައި 6 އަހަރުން ދަށުން ފެށިގެން 18 އަހަރުން ދަށުގެ އުމުރުފުރާތަކާއި، 18 އަހަރާއި 35 އަހަރާ ދެމެދުގެ ޒުވާނުންގެ އުމުރުފުރާ ހިމެނެއެވެ.
މިދިޔަ އަހަރުގެ މުބާރާތުގައި ރާއްޖޭގެ ހުރިހާ އަތޮޅަކުން 165 ބައިވެރިން މަދަހަ ހުށަހަޅާފައިވާއިރު، މިއަހަރުގެ މުބާރާތުގައިވެސް އަތޮޅުތަކުން މަދަހަ ބައިވެރިކުރުމުގެ ފުރުސަތު ވަނީ ހުޅުވާލާފައެވެ. އަދި ރަށްފުށުގެ ރީތި މަންޒަރުތައް ފެންނަ ގޮތަށް، ވާޗުއަލްކޮށް މަދަހަ ހުށަހެޅުމުގެ ފުރުސަތު ވެސް ލިބޭނެއެވެ.
މިދިޔަ އަހަރުގެ މަދަހަ ރަން އަޑުގެ ވެރިއަކަށް ހޮވިފައިވަނީ އަހްމަދިއްޔާ އިންޓަނޭޝަނަލް ސްކޫލްގެ ދަރިވަރު މުޝާޠު މުސްތާޤުއެވެ. މުބާރާތުގައި ބައިވެރިވުމަށް ބޭނުންވާ ފަރާތްތަކަށް 7316256 މި ނަންބަރަށް ގުޅުމުން މަޢުލޫމާތު ސާފުކުރެވޭނެކަމަށް އިންތިޒާމުކުރާ ފަރާތުން ބުނެފައިވެއެވެ.
މި މުބާރާތަކީ މިހާތަނަށް އެންމެ ގިނަ އަމިއްލަ ޅެމާއި އެންމެ ގިނަ އަމިއްލަ ރާގު ގެނެސްދިނުމުގެ ރެކޯޑް ގާއިމްކޮށްފައިވާ މަދަހަ މުބާރާތެއްކަން ފާހަގަކޮށްލެވެއެވެ.