ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭގެ ދެވަނަ ފިޔަވަހިން އިތުރު 8 ބިން ހަމައެކަނި ދިވެހިންނަށް ގަނެވޭ ގޮތަށް ވިއްކަން ހުޅުވާލައިފިއެވެ.
އެޗްޑީސީން މަޢުލޫމާތު ދިން ގޮތުގައި، ބީލަމުގެ އުސޫލުން ދޫކުރާ މި 8 ބިމުގެ ތެރޭގައި ހިމެނެނީ ބީޗް ފްރަންޓުން ދޫކުރާ 2 ބިމަކާއި ބީޗް ސައިޑުން ދޫކުރާ 6 ބިމެވެ. ބީޗް ފްރަންޓުން ވިއްކުމަށް ހުޅުވާލާފައިވަނީ 1708 އަކަފޫޓުގެ ބިމަކާއި 1737 އަކަފޫޓުގެ ބިމެކެވެ. އަދި ބީޗް ސައިޑުން ދޫކުރަނީ 1513 އަކަފޫޓާއި 1534 އަކަފޫޓާ ދެމެދުގެ ބިންތަކެކެވެ.
މި ބިންތަކަށް ބީލަން ހުށަހެޅޭނީ އުމުރުން 18 އަހަރުވެފައިވާ ދިވެހިންނަށެވެ. އަދި ކުންފުންޏަކުން ބީލަން ހުށަހަޅާނަމަ، އެ ކުންފުންޏަކީ ރާއްޖޭގައި ރަޖިސްޓްރީކޮށްފައިވާ 100 ޕަސެންޓް ދިވެހިންގެ ހިއްސާ އޮންނަ ކުންފުންޏަކަށް ވާންޖެހޭނެއެވެ.
ބީޗް ފްރަންޓް ބިންތަކުގެ ބީލަން ފެށޭ އަގަކީ އަކަފޫޓަކަށް 4,500 ރުފިޔާއެވެ. އަދި ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ އަކަފޫޓަކަށް 4,000 ރުފިޔާއެވެ.
އެޗްޑީސީން އިތުރަށް ބުނީ ކޮންމެ މީހަކަށް ވެސް އެއް ބިމަށް ވުރެ ގިނަ ބިން ގަތުމަށް އެދި އީއޯއައި ހުށަހެޅިދާނެ ކަމަށެވެ. އަދި ވިއްކަން ހުޅުވާލާފައިވާ ބިންތަކުގެ މަޢުލޫމާތު އެޗްޑީސީގެ އޮންލައިން ބިޑް ޕޯޓަލް މެދުވެރިކޮށް ބެލޭނެ ކަމަށްވެސް މަޢުލޫމާތު ދީފައިވެއެވެ.
މި ފުރުޞަތަކީ ދިވެހިންނަށް ހުޅުމާލޭގެ ދެވަނަ ފިޔަވަހިން ބިން ގަތުމުގެ ޚާއްޞަ ފުރުޞަތެއްކަން ފާހަގަކުރެވެއެވެ.