އިންޑިއާގެ އުއްތަރު ޕްރަދޭޝް ސްޓޭޓްގެ ޖާންސީގައި ހުރި މަހާރާނީ ލަކްޝްމީބާއީ މެޑިކަލް ކޮލެޖުގެ ނިއޯނޭޓަލް ޔުނިޓުގައި ހިނގި އަލިފާނުގެ ހާދިސާއެއްގައި 10 ތުއްތު ކުދިން މަރުވެ، އިތުރު 16 ކުދިންގެ ހާލަތު ސީރިއަސްވެފައިވާ ކަމަށް އިންޑިއާގެ އިސް އޮފިޝަލުން މަޢުލޫމާތު ދީފިއެވެ.
މި ހާދިސާ ހިނގާފައިވަނީ ހުކުރު ދުވަހުގެ ރޭ، އިންޑިއާގެ ވެރިރަށް ނިއު ދިއްލީގެ ދެކުނުން ގާތްގަނޑަކަށް 450 ކިލޯމީޓަރު ދުރުގައި އޮންނަ ޖާންސީގެ ހޮސްޕިޓަލުގައެވެ. އަލިފާނުގެ ހާދިސާ ހިނގި ސަބަބު އަދި ސާފުވެފައި ނުވިނަމަވެސް، މައްސަލަ ޖެހިފައިވާ އޮކްސިޖަން މެޝިނަކުން ކަމަށް ބެލެވޭ ކަމަށް އޮފިޝަލުން ބުނެފައިވެއެވެ.
އުއްތަރު ޕްރަދޭޝްގެ ޑެޕިއުޓީ ޗީފް މިނިސްޓަރު ބްރަޖޭޝް ޕަތަކް ވިދާޅުވި ގޮތުގައި، މަރުވި 10 ކުދިންގެ ތެރެއިން ހަތް ކުދިންގެ ހަށިގަނޑު ވަނީ ދެނެގަނެވިފައެވެ. އަދި ސަލާމަތްކުރެވުނު ކުދިންގެ ތެރެއިން 16 ކުދިންގެ ހާލަތު ވަރަށް ސީރިއަސް ކަމަށް އިންޑިއާގެ މީޑިއާތަކުން ރިޕޯޓުކޮށްފައިވެއެވެ.
މި ހާދިސާއާ ގުޅިގެން އުއްތަރު ޕްރަދޭޝްގެ ޗީފް މިނިސްޓަރު ޔޯގީ އާދިތުޔަނާތު ވަނީ މަރުވި ކުދިންގެ އާއިލާތަކަށް 500,000 ރުޕީސް (5,900 ޑޮލަރު) ގެ ބަދަލެއް ދޭނެ ކަމަށް އިޢުލާނުކުރައްވާފައެވެ. އަދި މި ހާދިސާ ހިނގަން މެދުވެރިވި ސަބަބު ބަލައި، ޒިންމާ ނަގަންޖެހޭ ފަރާތްތަކާމެދު ހަރުކަށި ފިޔަވަޅު އަޅާނެ ކަމަށްވެސް އޮފިޝަލުން ބުނެފައިވެއެވެ.
އިންޑިއާގައި އިމާރާތްކުރުމުގެ ފެންވަރު ދަށްވުމާއި ސަލާމަތީ ކަންކަން ދޯދިޔާވުމުގެ ސަބަބުން އަލިފާނުގެ ހާދިސާތައް ހިނގުން އާންމު ކަމެކެވެ. މި ހާދިސާ ހިނގާފައިވަނީ ނިއު ދިއްލީގެ ކުޑަކުދިންގެ ހޮސްޕިޓަލެއްގައި ހިނގި އަލިފާނުގެ ހާދިސާއެއްގައި ހަ ކުއްޖަކު މަރުވިތާ ހަ މަސް ފަހުންނެވެ.