އެމެރިކާއިން އދ އަށް ކަނޑައަޅާފައި ހުންނަވާ ސަފީރު ލިންޑާ ތޯމަސް ގްރީންފީލްޑް ވިދާޅުވެފައިވަނީ ފަލަސްތީނު ރައްޔިތުން ގަދަކަމުން ގެދޮރުން ނެރެ ޣައްޒާގައި ބަނޑުހައިހޫނުކަމުގެ ސިޔާސަތެއް ގެންގުޅެގެން ނުވާނެ ކަމަށެވެ.
އދ ސަލާމަތީ މަޖިލީހުގައި ވާހަކަފުޅު ދައްކަވަމުން ގްރީންފީލްޑް ވިދާޅުވީ އިސްރާއީލުން އަދިވެސް އެ ޤައުމުގެ އަމަލުތައް ފުރިހަމައަށް ތަންފީޒުކުރެވޭތޯ ކަށަވަރުކުރަން ޖެހޭނެ ކަމަށެވެ. އަދި ފަލަސްތީނުގެ ރިލީފް އެޖެންސީ (އަންރުވާ)ގެ އޮޕަރޭޝަން މަނާކުރާ ޤާނޫނެއް ތަންފީޒުކުރުން އިސްރާއީލުން މަޑުޖައްސާލުމަކީ މުހިންމު ކަމެއްކަމަށް އެކަމަނާ ފާހަގަކުރެއްވިއެވެ.
އދ.ގެ އެކްޓިން ޗީފް ޖޮއިސް މުސުޔާ ވިދާޅުވެފައިވަނީ ޣައްޒާގެ ބޮޑު ބައެއް މިހާރު ވަނީ ބިމާ ހަމަވެފައި ކަމަށާއި، އުތުރު ޣައްޒާއަށް އިންސާނީ އެހީތެރިކަން ވަނުމަށް އިސްރާއީލުގެ ކަމާބެހޭ ފަރާތްތަކުން ދަނީ ހުރަސް އަޅަމުން ކަމަށެވެ. ގާތްގަނޑަކަށް 75،000 މީހުން ތިބީ ފެނާއި ކާބޯތަކެތީން މަހުރޫމުވެފައި ކަމަށްވެސް އޭނާ ވިދާޅުވިއެވެ.
އެހެންނަމަވެސް، އިސްރާއީލުން އދ އަށް ކަނޑައަޅާފައި ހުންނަ ސަފީރު ޑެނީ ޑެނަން ވަނީ ޣައްޒާގެ ބަނޑުހައިހޫނުކަމުގެ ވާހަކަ ދޮގުކޮށް، ޣައްޒާގެ އިންސާނީ ހާލަތު ރަނގަޅު ކުރުމަށް އިސްރާއީލުން ކުރާ މަސައްކަތްތައް ފާހަގަކޮށްފައެވެ.
އދ ސަލާމަތީ މަޖިލީހުން މިހާރު ދަނީ ޣައްޒާގައި ޝަރުތުތަކާ ނުލައި އަދި ދާއިމީކޮށް ހަނގުރާމަ ހުއްޓާލުމަށް ގޮވާލާ ގަރާރެއްގެ ޑްރާފްޓެއް އެކުލަވާލުމާ ބެހޭ ގޮތުން މަޝްވަރާ ކުރަމުންނެވެ. މި ގަރާރުގައި ޣައްޒާއަށް ބޭނުންވާ އިންސާނީ އެހީތެރިކަން ފުރިހަމައަށް، ހަލުވި، ރައްކާތެރި އަދި ހުރަހެއް ނެތި ފޯރުކޮށްދިނުމަށްވެސް ހުށަހަޅާފައިވެއެވެ.
މިދިޔަ އަހަރު އޮކްޓޫބަރު 7 އިން ފެށިގެން އިސްރާއީލުން ޣައްޒާއަށް ދޭންފެށި ހަމަލާތަކުގައި މިހާތަނަށް ގާތްގަނޑަކަށް 43،700 މީހުން ވަނީ ޝަހީދުކޮށްލާފައި ކަމަށާއި، 103،000 އަށްވުރެ ގިނަ މީހުން ވަނީ ޒަޚަމްކޮށްލާފައިވާ ކަމަށް ރިޕޯޓުކޮށްފައިވެއެވެ.