ސަރުކާރުން އަންނަ އަހަރު ސަބްސިޑީގެ ގޮތުގައި އެންމެ ފަގީރު އާބާދީގެ 20 ޕަސެންޓަށް މަހަކު 2،450 ރުފިޔާ ޖަމާކޮށްދޭން ނިންމައިފި އެވެ. މި ނިންމުން ހާމަވެފައިވަނީ ފިނޭންސް މިނިސްޓްރީން އާންމުކުރި ބަޖެޓުގެ ތަފްސީލީ ރިޕޯޓުގައެވެ.
ރިޕޯޓުގައިވާ ގޮތުން، އާ ސަބްސިޑީ ސިޔާސަތު އެކުލަވާލެވިފައިވަނީ އެންމެ ފަގީރު އާބާދީއަށް އޭގެ ފައިދާ ލިބޭނެ ގޮތަށެވެ. މި ބަދަލާ އެކު، އަންނަ އަހަރުގެ ބަޖެޓުގައި 900 މިލިއަން ރުފިޔާ ވަނީ ސަބްސިޑީ ޓާގެޓުކޮށް، އެންމެ ބޭނުންޖެހިފައިވާ މީހުންނަށް ދިނުމަށް ކަނޑައަޅާފައެވެ.
މިހާރު ސަބްސިޑީ ދެމުން އަންނަނީ އެންމެންނަށް އެއް ހަމައެއްގައި ކަމަށްވާތީ، އޭގެ އެންމެ ބޮޑު ފައިދާ ކުރަނީ އެންމެ މުއްސަނދި ގޭބީސީތަކަށެވެ. ހިސާބުތަކުން ދައްކާ ގޮތުން، މިހާރު ސަބްސިޑީގެ 43 ޕަސެންޓު ބެހިފައިވަނީ އެންމެ މުއްސަނދި އާބާދީގެ 40 ޕަސެންޓަށެވެ. އެހެންނަމަވެސް، އެންމެ ފަގީރު އާބާދީގެ 20 ޕަސެންޓު ބޭނުންކުރަނީ ދައުލަތުން ދޭ ސަބްސިޑީގެ އެންމެ 17 ޕަސެންޓެވެ.
އާ ސަބްސިޑީ ނިޒާމަށް އަމަލުކުރަން ފަށާނީ އަންނަ އަހަރުގެ އޭޕްރީލް މަހުން ފެށިގެންނެވެ. މި ބަދަލާ އެކު، އެންމެ ފަގީރު 20 ޕަސެންޓް ގޭބީސީތަކުގެ މަހެއްގެ ހަރަދަށް 1،770 ރުފިޔާ އިތުރުވާނެ ކަމަށް ލަފާކުރެވެއެވެ.
ސަބްސިޑީ ދިނުމުގެ އުސޫލު ބަދަލުކުރެވެނީ ޑައިރެކްޓް ޓްރާންސްފާ ނިޒާމަކަށެވެ. މި ނިޒާމުގެ ދަށުން ކާޑު، ތެޔޮ، ކަރަންޓު އަދި ނަރުދަމާގެ ސަބްސިޑީ ދޭގޮތަށް ވަނީ ހަމަޖެހިފައެވެ. އާ ނިޒާމުގެ ދަށުން ސަބްސިޑީއަށް އެދި ހުށަހަޅަންޖެހޭނީ އަމިއްލައަށެވެ.
ފިނޭންސް މިނިސްޓްރީން ބުނާ ގޮތުގައި، މި އާ ނިޒާމުން އެންމެ ބޭނުންޖެހިފައިވާ މީހުންނަށް ވަރަށް ބޮޑަށް އިސްކަންދީ، އެ ފަރާތްތަކަށް ސީދާ ގޮތުން މަންފާ ލިބޭނެއެވެ.