ރާއްޖޭގައި އިއްޔެ ފެށުނު ދުނިޔޭގެ ބޮޑީބިލްޑިން ފިޒީކް ސްޕޯޓްސް ޗެމްޕިއަންޝިޕްގައި ދިވެހި ދެ އެތުލީޓުން ރަން މެޑަލް ހޯދައިފިއެވެ. މި ދެ އެތުލީޓުންނަކީ އަޒްނީން ރަޝާދާއި ޝާހީން އިބްރާހިމް ދީދީއެވެ.
އަޒްނީން ރަޝާދު މި މުބާރާތުން ރަން މެޑަލް ހޯދީ ވިދިވިދިގެން ތިންވަނަ ފަހަރަށެވެ. އޭނާ ވާދަކުރީ ސްޕޯޓްސް ފީޒީކް އަޕްޓް 170 ސެންޓްމީޓަރުގެ ކެޓަގަރީގައެވެ. އަޒްނީން ފުރަތަމަ ފަހަރަށް ވޯލްޑް ޗެމްޕިއަންޝިޕުން ރަން މެޑަލް ހޯދީ 2022 ވަނަ އަހަރު ތައިލެންޑްގައި ބޭއްވުނު މުބާރާތުންނެވެ. މިދިޔަ އަހަރު ދެކުނު ކޮރެއާގައި ބޭއްވުނު މުބާރާތުންވެސް އޭނާ ރަން މެޑަލް ހޯދިއެވެ.
އަޒްނީނަކީ ރާއްޖޭގައި ބޭއްވުނު އިންޓަނޭޝަނަލް ކުޅިވަރު މުބާރާތެއްގައި ރަން މެޑަލް ހޯދި ފުރަތަމަ ދިވެހި އެތުލީޓެވެ. އޭނާ މި ރެކޯޑު ހޯދީ 2022 ވަނަ އަހަރުގެ ޖުލައި މަހު ކ. މާފުށީގައި ބޭއްވުނު އޭޝިއަން ޗެމްޕިއަންޝިޕްގައެވެ.
ޝާހީން އިބްރާހިމް ދީދީ ރަން މެޑަލް ހޯދީ ބޮޑީބިލްޑިންގެ ސުޕަ ކެޓަގަރީއެއް ކަމަށްވާ 55 ކިލޯގެ އިވެންޓުންނެވެ. މިއީ ބޮޑީބިލްޑިންގެ 55 ކިލޯގެ ކެޓަގަރީން ދިވެއްސަކު ރަން މެޑަލް ހޯދި ފުރަތަމަ ފަހަރެވެ. މި ކާމިޔާބީއާއެކު ޝާހީން ވަނީ މިސްޓަ ވޯލްޑްގެ އިވެންޓަށް ކޮލިފައިވެފައެވެ.
މީގެ އިތުރުން، ބޮޑީބިލްޑިންގެ ސުޕަ ކެޓަގަރީގެ 75 ކިލޯގެ ކެޓަގަރީން ރާއްޖޭގެ ޖޫނިއާ އޯޕަން ޗެމްޕިއަން، ޔޫސުފް އަޔާން ރިޒްވީ ވަނީ ރިހި މެޑަލް ހޯދާފައެވެ.
މި މުބާރާތް ކުރިއަށްދަނީ އައްޑޫގެ ކެނެރީފް ރިސޯޓްގައެވެ. މުބާރާތް ފެށުމަށް ބޭއްވުނު އިވެންޓްގައި ނިވާކަން ކުޑަ ހެދުމުގައި ޕާފޯމް ކުރުމާ ގުޅިގެން އާންމުންގެ ފާޑުކިޔުން އަމާޒުވެފައިވަނީ ބޮޑީބިލްޑިން އެސޯސިއޭޝަނަށެވެ. މިކަމާ ގުޅިގެން އެސޯސިއޭޝަނުން ވަނީ އާންމުންގެ ކިބައިން މަޢާފަށް އެދި ބަޔާނެއް ނެރެފައެވެ.