ދުނިޔޭގެ ކާބޯތަކެތީގެ އަގު އޮކްޓޯބަރު މަހު 18 މަސް ފަހުން އެންމެ މައްޗަށް ގޮސްފައިވާ ކަމަށް އދ. ގެ ފުޑް އެންޑް އެގްރިކަލްޗަރ އޯގަނައިޒޭޝަން (އެފްއޭއޯ) އިން ހުކުރު ދުވަހު ބުނެފިއެވެ. މީގެ ތެރޭގައި ތެޔޮ ބާވަތްތަކުގެ އަގު ބޮޑުތަނުން މައްޗަށް ގޮސްފައިވާ ކަމަށް އެފްއޭއޯ އިން ފާހަގަކޮށްފައިވެއެވެ.
އެފްއޭއޯގެ ފުޑް ޕްރައިސް އިންޑެކްސް އިން ދައްކާ ގޮތުގައި، އޮކްޓޯބަރު މަހު ކާބޯތަކެތީގެ އަގު 127.4 ޕޮއިންޓަށް އަރާފައިވެއެވެ. މިއީ ސެޕްޓެމްބަރު މަހާ އަޅާބަލާއިރު ދެ އިންސައްތައިގެ އިތުރުވުމެކެވެ.
މިއީ 2023 ވަނަ އަހަރުގެ އޭޕްރިލް މަހުން ފެށިގެން އެންމެ މަތީ އަގެވެ. ނަމަވެސް، 2022 ވަނަ އަހަރުގެ މާރިޗު މަހު ރަޝިޔާއިން ޔުކްރެއިނަށް ހަމަލާދިނުމާ ގުޅިގެން ރެކޯޑު އަގަށް އަރާފައިވާ މިންވަރާ އަޅާބަލާއިރު އަދިވެސް 20.5 އިންސައްތަ ދަށެވެ.
އޮކްޓޯބަރު މަހު ތެޔޮ ބާވަތްތަކުގެ އަގު 7.3 އިންސައްތަ އިތުރުވެފައިވެއެވެ. މިއީ ދެ އަހަރު ތެރޭގައި މި ބާވަތްތަކުގެ އަގު އެންމެ މައްޗަށް ދިޔަ މިންވަރެވެ. މިގޮތަށް އަގު މައްޗަށް ގޮސްފައިވަނީ އުފެއްދުންތެރިކަން ދަށްވުމާ ގުޅިގެންނެވެ.
ހަކުރުގެ އަގު 2.6 އިންސައްތަ އިތުރުވެފައިވާއިރު، ކިރު އުފެއްދުންތަކުގެ އަގު 2.5 އިންސައްތަ އަދި ހަނޑޫ، ގޮދަން ފަދަ ބާވަތްތަކުގެ އަގު 0.8 އިންސައްތަ އިތުރުވެފައިވެއެވެ.
މަހުގެ އަގަކީ އެކަނި ދަށްވެފައިވާ ބާވަތެވެ. މަހުގެ އަގު ވަނީ ކުރީ މަހާ އަޅާބަލާއިރު 0.3 އިންސައްތަ ދަށްވެފައެވެ.
އެފްއޭއޯ އަކީ އދ. ގެ އޭޖެންސީއެކެވެ.