ކުޑަކުދިން ސްކްރީން ބެލުން މަދުކުރުމަށް ސްވިޑަން އިން ގޮވާލައިފި

ސްވިޑަންގެ ޕަބްލިކް ހެލްތު އެޖެންސީން ކުޑަކުދިން ޓީވީ އަދި ސްކްރީން ބެލުމުގެ ފުރުސަތު މަދުކުރުމަށް ބެލެނިވެރިންގެ ކިބައިން އެދިއްޖެއެވެ. މި ގޮތުން:

– ދެ އަހަރުން ދަށުގެ ކުދިން: ޑިޖިޓަލް މީޑިއާ އާއި ޓީވީއާ މުޅިން ދުރުގައި ގެންގުޅެންޖެހޭ
– 2-5 އަހަރާ ދެމެދުގެ ކުދިން: ދުވާލަކަށް އެންމެ ގިނަވެގެން އެއް ގަޑިއިރު
– 6-12 އަހަރާ ދެމެދުގެ ކުދިން: ދުވާލަކު އެއް ނުވަތަ ދެ ގަޑިއިރަށް ވުރެ ގިނަނުވާ ގޮތަށް
– 13-18 އަހަރާ ދެމެދުގެ ކުދިން: ދުވާލަކު ދެތިން ގަޑިއިރަށް ލިމިޓް ކުރުން

ޕަބްލިކް ހެލްތު މިނިސްޓަރު ޖެކޮބް ފޯސްމެޑް ވިދާޅުވީ، ސްވިޑެންގައި 13-16 އަހަރާ ދެމެދުގެ ކުދިން އެވްރެޖްކޮށް ދުވާލަކު ހައެއްކަ ގަޑިއިރު ސްކޫލުން ބޭރުގައި ހޭދަކުރަނީ ސްކްރީން ކުރިމަތީގައި ކަމަށެވެ. މިކަމުގެ ސަބަބުން އިޖުތިމާއީ ކަންކަމަށް އޮންނަ ވަގުތު ވަރަށް ބޮޑަށް ކުޑަވެފައިވާ ކަމަށް އޭނާ ފާހަގަކުރެއްވިއެވެ.

ހެލްތު އެޖެންސީން އިތުރަށް އިލްތިމާސްކޮށްފައިވަނީ:
– ކުދިން ނިދުމުގެ ކުރިން ސްކްރީން ބޭނުން ނުކުރުމަށް
– ރޭގަނޑު ފޯނު އަދި ޓެބްލެޓް ކޮޓަރިން ބޭރުގައި ބެހެއްޓުމަށް

މާގިނައިން ސްކްރީން ބޭނުންކުރުމަކީ ނިދި މަދުވެ، ޑިޕްރެޝަން އަދި ހިތްހަމަނުޖެހުމުގެ އިހްސާސްތަކަށް މަގުފަހިވާ ކަމެއް ކަމަށް ދިރާސާތަކުން ދައްކައެވެ. ސްވިޑަންގެ ސަރުކާރުން މީގެ ކުރިން ވަނީ ޕްރައިމަރީ ސްކޫލްތަކުގައި ސްމާޓްފޯން ބޭނުންކުރުން މަނާކުރަން ވިސްނަމުން އަންނަ ކަމަށް ބުނެފައެވެ.