ހޮލިވުޑުގެ މަޝްހޫރު ތަރި ޓޮމް ކްރޫޒް، ޕެރިސް 2024 އޮލިމްޕިކް ގޭމްސްގެ ނިމުމުގެ ރަސްމިއްޔާތުގައި ހައިރާންކުރުވަނިވި ޙަރަކާތެއް ދައްކައި، އެންމެންގެ ސަމާލުކަން ހޯދައިފިއެވެ.
އާދީއްތަ ދުވަހު ބޭއްވުނު މި ރަސްމިއްޔާތުގައި ކްރޫޒް ވަނީ ސްޓޭޑް ޑި ފްރާންސްގެ ފުރާޅުން ގާތްގަނޑަކަށް 160 ފޫޓުގެ އުސްމިނުން ތިރިއަށް ފައިބައިފައެވެ. އޭގެ ފަހުން އޮލިމްޕިކް ދިދަ ހިފައިގެން މޮޓޯސައިކަލެއްގައި ދުއްވާފައި ގޮސްފައިވެއެވެ. މިއީ 2028 ވަނަ އަހަރު ބޭއްވުމަށް ހަމަޖެހިފައިވާ ލޮސް އެންޖެލެސް އޮލިމްޕިކްސްގެ ކައުންޓްޑައުން ފެށުމުގެ ގޮތުން ކުރެވުނު ކަމެކެވެ.
ކްރޫޒްގެ މި ޙަރަކާތް ދެއްކުމަށްފަހު، ކުރިން ރެކޯޑުކޮށްފައިވާ ވީޑިއޯއެއް ދެއްކިއެވެ. އެއީ 62 އަހަރުގެ ކްރޫޒް ހޮލިވުޑް ސައިންއަށް ސްކައިޑައިވްކޮށްގެން ފައިބާ މަންޒަރެވެ. އެ މަޝްހޫރު ލޭންޑްމާކްގައި އޮލިމްޕިކް ރިންގްސް ހިމަނާފައިވާ ތަން ފުޅާކޮށް ދައްކާލިއެވެ.
ނިމުމުގެ ރަސްމިއްޔާތުގައި އޮލިމްޕިކް ދިދަ ވަނީ ކުރީގެ އަދި މިހާރުގެ އެމެރިކާގެ އޮލިމްޕިއަނުންގެ އަތުން އަތަށް ބަދަލުކުރަމުން ސިޓީ ތެރެއިން ގެންގޮސް ބީޗް ޕާޓީއަކާ ހަމައަށް ގެންގޮސްފައެވެ. އެތާނގައި ކެލިފޯނިއާގެ މަޝްހޫރު މިއުޒިކް ބޭންޑުތަކުން ޝޯވއެއް ދެއްކިއެވެ.
ޕެރިސް އޮލިމްޕިކްސްގެ ތެރޭގައިވެސް ކްރޫޒް ވަނީ ޖިމްނާސްޓިކްސް، ފެތުން އަދި ފުޓުބޯޅަ މުބާރާތްތަކުގައި ބައިވެރިވެފައެވެ. ކްރޫޒްގެ މި ޙަރަކާތްތަކުން ވަނީ އޮލިމްޕިކްސްގެ ނިމުމުގެ ރަސްމިއްޔާތަށް އިތުރު ފޯރިއެއް ގެނެސްދީފައެވެ.