ހަތިޔާރު ހުސްވެގެން ޕެންޓަގަން އިން އިންޓަސެޕްޓަރ މިސައިލް އުފެއްދުން އަވަސް ކުރުމަށް ބިލިއަން ޑޮލަރުގެ ކޮންޓްރެކްޓެއް ހަވާލުކުރެ

އީރާނާ ދެކޮޅަށް ކުރި ހަނގުރާމައިގެ ތެރޭގައި އެމެރިކާ އަސްކަރިއްޔާގެ ސްޓޮކްގައި ހުރި ވަޒަންތައް ފުރިހަމަ ކުރުމުގެ މަސައްކަތުގައި އެސްއެމް-6 އިންޓަސެޕްޓަރ މިސައިލް އުފެއްދުން އަވަސް ކުރުމަށް 24.4 ބިލިއަން ޑޮލަރުގެ ކޮންޓްރެކްޓެއް އެމެރިކާގެ އަސްކަރީ ސިނާއަތްތަކުގެ ކުންފުނި ރޭތިއަންއާ ހަވާލުކޮށްފައިވާ ކަމަށް އެމެރިކާގެ ޑިފެންސް ޑިޕާޓްމަންޓުން ބުރާސްފަތި ދުވަހު އިއުލާންކޮށްފި އެވެ .

ޕެންޓަގަން އިން ނެރުނު ބަޔާނެއްގައި ބުނެފައި ވަނީ މި މިސައިލްތަކަކީ ”ވައިޓަލް އެންޓި އެއާ އަދި ސަރފޭސް މުނިޝަންސް“ ކަމަށާއި އިތުރު ދެ އަހަރަށް އިތުރު ކުރެވޭ ފަސް އަހަރުގެ އެއްބަސްވުމުން ”އުފެއްދުމުގެ ދުވެލި އަވަސްވާނެ“ ކަމަށެވެ.

އެ ބަޔާނުގައި އިތުރަށް ބުނެފައި ވަނީ މި ޑީލަކީ ”ވޯކްފޯސްގެ ގާބިލްކަން ފުޅާކޮށް މުހިންމު ސަޕްލައި ޗޭންތައް ރައްކާތެރި ކުރުމަށް ބޭނުންވާ ދިގު މުއްދަތުގެ ޕްރެޑިކްޓެބިލިޓީ ޑިފެންސް އިންޑަސްޓްރީތަކަށް ލިބިދޭ ޑީލެއް“ ކަމަށެވެ.

ކޮންގްރެސް ފަންޑިންގ

ރޮއިޓާސް އިން އިންޑަސްޓްރީގެ އެގްޒެކެޓިވުންނާ ހަވާލާދީ ބުނެފައި ވަނީ މި ޑީލްތަކަށް ކޮންގްރެސް އިން އަދި ބޭނުންވާ ފައިސާ ކަނޑައަޅާފައި ނުވާ ކަމަށާއި މާނައަކީ ގާނޫނު ހަދާ މަޖިލީހުގެ މެމްބަރުން ފިޔަވަޅު އަޅަންދެން ކޮންޓްރެކްޓަރުންނަށް ކޮމްޕޯނެންޓްތަކާއި ފެސިލިޓީތަކަށް ފުޅާދާއިރާއެއްގައި އިންވެސްޓް ނުކުރެވިދާނެ ކަމަށެވެ.

ކައިރި އަދި ދިގު މުއްދަތުގައި ބޭނުންތައް ފުއްދުމަށް އުފެއްދުން ވަރަށް ބޮޑަށް އިތުރުކުރުމުގެ މަގުސަދުގައި ހުނަރުވެރި ވަޒީފާގެ ބާރު އިތުރުކޮށް، މުޅި ޑިފެންސް އިންޑަސްޓްރިއަލް ބޭސްގައި ޕާޓްނަޝިޕްތައް ހަރުދަނާކޮށްފައިވާތީ، ޑިމާންޑް އިތުރުވުމާ އެއްވަރަށް އިންވެސްޓްކޮށްފައިވާ ކަމަށް އާރުޓީއެކްސް އިން އިއުލާންކޮށްފި އެވެ.

ރޭތިއަން ބުނާ ގޮތުގައި އެސްއެމް-6 މިސައިލަކީ ވައިގެ ހަނގުރާމައިގެ މިޝަންތައް ކުރިއަށް ގެންދިއުމާއި، ބިމުގެ އަމާޒުތަކަށް ހަމަލާދިނުމާއި، ބެލިސްޓިކް މިސައިލްތަކުން ދިފާއުވުމުގެ ގާބިލްކަން ސާބިތުވެފައިވާ ހަމައެކަނި ހަތިޔާރެވެ .

އެމެރިކާގެ ހަތިޔާރު ހުސްވަމުން އެބަދެއެވެ

ބުރާސްފަތި ދުވަހު ޝާއިއުކުރި އިންޓަވިއުއެއްގައި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ ”ބައެއް ބާވަތުގެ ވަޒަން އަނެއް ބަޔަކަށް ވުރެ ތަންކޮޅެއް މަދު“ ކަމަށެވެ. ނަމަވެސް އޭނާ ބުނަމުން ދިޔައީ ޖުމްލަކޮށް ހަތިޔާރު ސްޓޮކްކޮށްފައި ހުރި މިންވަރު ”ރަނގަޅު ހާލަތެއްގައި“ ކަމަށާއި ސަބަބަކީ އެމެރިކާއިން ”މިދިޔަ ހަ މަސް ދުވަހު އެ ހަތިޔާރު ސްޓޮކް ކުރަމުން އަންނަތީ“ ކަމަށެވެ.

މި މައުޟޫއަށް ޓްރަމްޕް ދެއްކެވި އެންމެ ހަރުކަށި ބަޔާނަކީ ބައެއް ސާމާނުގެ ސްޓޮކްޕައިލްތައް “ތަންކޮޅެއް ތޫނު” ކަމަށް އޮގަސްޓް މަހު އެއްބަސްވުމެވެ.