މިއަދުގެ ދުނިޔޭގައި ޑެލިވަރީ އާއި ނޭވިގޭޝަން ހިދުމަތުން ފެށިގެން އިންޝުއަރެންސް، ހައުސިން އަދި ކްރެޑިޓާ ހަމައަށް ސިޓީތައް ހިންގުމުގައި ޑޭޓާ އާއި އެލްގޮރިޒަމްތަކުގެ ދައުރު ދަނީ ދުވަހެއް ދުވަހަކަށް ބޮޑުވަމުންނެވެ. ނަމަވެސް، މި ނުފެންނަ ޑިޖިޓަލް ޖިއޮގްރަފީގެ ތެރޭގައި، އެލްގޮރިޒަމްތަކުން އިޖުތިމާޢީ އަދި އިޤްތިޞާދީ ވަކިވުމުގެ އުސޫލުތައް އުފައްދައި، ބައެއް ސަރަހައްދުތައް ބާކީކުރަމުންދާ ކަމުގެ ކަންބޮޑުވުން ވަނީ އިތުރުވެފައެވެ.
މީގެ ނަތީޖާއެއްގެ ގޮތުން، ބައެއް އަވަށްތައް ”ގެއްލިފައިވާ ސިޓީތަކެއް“ ގޮތުގައި ސިފަކުރެވެން ފަށައިފިއެވެ. މިއީ ދުނިޔޭގެ ޗާޓުން ފެންނަން ހުރި އަވަށްތަކެއް ނަމަވެސް، އެތަންތަނުގައި ދިރިއުޅޭ މީހުންގެ ދުވަހުގެ ފުރުސަތުތައް ކަނޑައަޅާ އެލްގޮރިޒަމްތަކުގެ ނަޒަރުގައި އެއީ ”ނެތް“ ތަންތަނެވެ.
ޑިޖިޓަލް އެލްގޮރިޒަމްތަކުގެ ތެރޭގައި ”ރަތް ރޮނގުތަކެއް“
މި މައްސަލައަކީ ތާރީޚީ ގޮތުން ކުރިންވެސް އޮތް ”ރެޑް ލައިނިން“ އުސޫލުގެ ޑިޖިޓަލް ސިފައެކެވެ. އެމެރިކާގެ ”ނިއު ޑީލް“ ޒަމާނުގައި، ހޯމްއޯނަރސް ލޯން ކޯޕަރޭޝަނުން ވަނީ ނަސްލީ ތަފާތުކުރުންތަކުގެ މައްޗަށް ބިނާކޮށް ސިޓީތައް މެޕްކޮށްފައެވެ. އޭރު އެންމެ ދަށް ސަރަހައްދުތައް ފާހަގަކުރީ ރަތްކުލައިންނެވެ. ޔުނިވާސިޓީ އޮފް ރިޗްމަންޑްގެ ދިރާސާތަކުން ދައްކާގޮތުގައި، އެ މެޕްތަކުގެ ނޭދެވޭ އަސަރު މިއަދާ ހަމައަށްވެސް އިގްސާދީ ފަރަގުތަކުގެ ގޮތުގައި ފެންނަން އެބަހުއްޓެވެ.
މިޒަމާނުގެ ސްމާޓް ނެވިގޭޝަން އެޕްތަކުގެ ސަބަބުންވެސް މިފަދަ ބަދަލުތައް އަންނަނީ ފެންނަމުންނެވެ. ބައެއް ހަމަހިމޭން ރެސިޑެންޝަލް މަގުތައް ކުއްލިއަކަށް ބިޒީ ބައިޕާސްތަކަށް ބަދަލުވެ، އޭގެ ސަބަބުން އަޑުގަދަވުމާއި ތަޣައްޔަރުވުން އިތުރުވެ، ދިރިއުޅުމުގެ ފެންވަރު ދަށްވެއެވެ. ބޮސްޓަންގެ ޑޯޗެސްޓާ ސަރަހައްދުގެ ރައްޔިތުންނާއި ފްރާންސްގެ ބައެއް ކުދި ރަށްރަށުގެ މީހުން ވަނީ މިކަމުގެ ޝަކުވާ އުފުލާފައެވެ.
ބޯހިޔާވަހިކަމާއި މާލީ ދާއިރާގައި ނަސްލީ ތަފާތުކުރުން
މާލީ އިދާރާތަކުން ބޭނުންކުރާ އާޓިފިޝަލް އިންޓެލިޖެންސް (AI) މޮޑެލްތަކުން ޕޯސްޓް ކޯޑް ފަދަ ވެރިއޭބަލްތަކަށް ބަރޯސާވުމުގެ ސަބަބުން، ވަކި ސަރަހައްދުތަކެއްގެ މީހުންނަށް ލޯނު ލިބުމުގައި ހުރަސްތައް ކުރިމަތިވެއެވެ. ’ދަ މާކަޕް‘ އިން ނެރުނު ރިޕޯޓެއްގައިވާ ގޮތުން، މާލީ ގާބިލްކަން އެއްވަރު ނަމަވެސް، މައިނޯރިޓީ ގްރޫޕްތަކުގެ މީހުންގެ ލޯނު އެޕްލިކޭޝަންތައް ރިޖެކްޓްވުމުގެ ފުރުސަތު ބޮޑެވެ.
މީގެ މިސާލެއްގެ ގޮތުން ނޯތު ކެރޮލައިނާގެ ޝާލޮޓްގައި ދިރިއުޅޭ ކަޅު ނަސްލުގެ ދެމަފިރިއެއްގެ ލޯނު އެޕްލިކޭޝަން، ބޭންކުގެ އޮޓޮމެޓިކް ސިސްޓަމުން ބާތިލްކުރި ހާދިސާ ފާހަގަކޮށްލެވެއެވެ. މިފަދަ ތަފާތުކުރުންތަކާ ގުޅިގެން އެމެރިކާގެ ޖަސްޓިސް ޑިޕާޓްމަންޓުން ވަނީ 2023 ވަނަ އަހަރު އެމެރިސް ބޭންކާ އެކު 9 މިލިއަން ޑޮލަރުގެ، އަދި އޯޝަން ފަސްޓް ބޭންކާ އެކު 15.1 މިލިއަން ޑޮލަރުގެ ސެޓްލްމަންޓްތަކެއް ހަދާފައެވެ.
އިންސާފުވެރި އެލްގޮރިޒަމްތަކަކަށް އޮތް އުންމީދު
މި ހުރިހާ މެކޭނިޒަމްތަކެއް އެކުވުމުން، ވަކި ސަރަހައްދުތަކެއްގެ މުދަލުގެ އަގު ދަށްވެ، ފަގީރުކަން އިތުރުވެ، އިޖުތިމާޢީ ވަކިވުން ވަރުގަދަވެއެވެ. ދިރާސާތަކުން ދައްކާ ގޮތުގައި ޝެއަރޑް ޓްރާންސްޕޯޓްގެ އަގުތައް ކަނޑައެޅުމުގައިވެސް އަވަށްތަކުގެ ޑިމޮގްރަފިކްސްއަށް ބަލައި ތަފާތުކުރުންތައް ގެންގުޅެއެވެ.
ނަމަވެސް، މީގެ ހައްލަކީ ޓެކްނޮލޮޖީއާ ދެކޮޅު ހެދުމެއް ނޫނެވެ. ގްރީންލައިނަރސް އިންސްޓިޓިއުޓުން ލަފާދޭ ގޮތުގައި، އެލްގޮރިޒަމްތައް ބޭނުންކުރަންވީ ސަރަހައްދުތައް ބާކީކުރުމުގެ ބަދަލުގައި، އެހީތެރިކަން ބޭނުންވާ ސަރަހައްދުތަކަށް އިންވެސްޓްމަންޓްތައް އަމާޒުކުރުމަށެވެ. މީގެ އިތުރުން، އެލްގޮރިޒަމްތަކުގެ މިނިވަން އޮޑިޓްތައް ހެދުމާއި، ސިސްޓަމްތައް ޑިޒައިންކުރުމުގައި ކޮމިއުނިޓީތައް ބައިވެރިކުރުމަކީ މުހިންމު ކަމެކެވެ.
ސިޓީތަކަކީ ހަމައެކަނި ވިޔަފާރި މާކެޓްތަކެއް ނޫނެވެ؛ އެއީ އިންސާނީ ގުޅުންތަކާއި ހަމަހަމަ ފުރުސަތުތައް އޮންނަންޖެހޭ އިޖުތިމާޢީ ޖާގަތަކެކެވެ. އެލްގޮރިޒަމްތަކުން އުފައްދާ ”ގެއްލިފައިވާ ސިޓީތައް“ ނައްތާލެވޭނީ ކޮންމެ އަވަށަކީވެސް ސިޓީގެ މުހިންމު ބައެއްގެ ގޮތުގައި ބަލައިގަންނަ ސިޔާސީ އިޚްތިޔާރުތަކެއް ނެގިގެންނެވެ.
ނޫސްވެރިޔާ