އީޑަން މައިކަލް ވޯލްޓަރ ލޫސިއަން ހަޒާޑަކީ ފުޓްބޯޅަ ދުނިޔެ ދުށް އެންމެ ހުނަރުވެރި އެއް ކުޅުންތެރިޔާއެވެ. 7 ޖެނުއަރީ 1991 ގައި އުފަންވި ހަޒާޑަކީ ބެލްޖިއަމްގެ ކުރީގެ ޕްރޮފެޝަނަލް ފުޓްބޯޅަ ކުޅުންތެރިއެކެވެ. އޭނާ މައިގަނޑު ގޮތެއްގައި ކުޅެފައިވަނީ ވިންގާ ނުވަތަ އެޓޭކިން މިޑްފީލްޑަރެއްގެ މަގާމަށެވެ. 17 އަހަރުގެ ދިގު ކެރިއަރުގައި އޭނާ ވަނީ ފްރާންސްގެ ލިލް، އިނގިރޭސިވިލާތުގެ ޗެލްސީ، އަދި ސްޕެއިންގެ ރެއާލް މެޑްރިޑްގެ އިތުރުން ބެލްޖިއަމްގެ ގައުމީ ޓީމަށް ކުޅެފައެވެ. އޭނާގެ ފާހަގަކޮށްލެވޭ ޑްރިބްލިންގ އާއި، އުފެއްދުންތެރި ކުޅުމުގެ ސަބަބުން އޭނާއަކީ އޭނާގެ ޖީލުގެ އެންމެ މޮޅު އެއް ކުޅުންތެރިޔާގެ ގޮތުގައި ގިނަ ބަޔަކު ގަބޫލުކުރެއެވެ.
ކުރީކޮޅުގެ ދިރިއުޅުމާއި އާއިލާ
ހަޒާޑް އުފަންވީ ބެލްޖިއަމްގެ ލާ ލޫވިއަރ އަށެވެ. އޭނާ ބޮޑުވީ ބްރޭން ލެ ކޮމްޓްގައެވެ. އޭނާގެ އާއިލާއަކީ ފުޓްބޯޅައާ ވަރަށް ބޮޑަށް ގުޅިފައިވާ އާއިލާއެކެވެ. ބައްޕަ ތިއަރީ އާއި މަންމަ ކެރީންއަކީ ވެސް ކުރީގެ ފުޓްބޯޅަ ކުޅުންތެރިންނެވެ. ބައްޕަ ކުޅުނީ ބެލްޖިއަމްގެ ދެވަނަ ޑިވިޝަންގައި ޑިފެންސިވް މިޑްފީލްޑަރެއްގެ ގޮތުގައެވެ. މަންމައަކީ ބެލްޖިއަމްގެ އަންހެން ފުރަތަމަ ޑިވިޝަންގެ ފޯވާޑެކެވެ. ހަޒާޑަކީ އާއިލާގެ ހަތަރު ފިިހެން ކުދިންގެ ތެރެއިން އެންމެ ދޮށީ ކުއްޖާއެވެ. އޭނާގެ ތިން ކޮއްކޮއިންނަކީ ވެސް ފުޓްބޯޅަ ކުޅުންތެރިންނެވެ. އޭގެ ތެރެއިން ތޯގަން ހަޒާޑަކީ ޗެލްސީގައި އޭނާއާއެކު ކުޅުނު ކުޅުންތެރިއެކެވެ.
ހަޒާޑްގެ އާއިލާ ދިރިއުޅުނީ ފުޓްބޯޅަ ދަނޑަކާ އެންމެ ތިން މީޓަރު ދުރުގައެވެ. މިއީ އޭނާގެ ހުނަރު ތަރައްގީވުމަށް ލިބުނު ބޮޑު ފުރުސަތެކެވެ. އޭނާ އެންމެ ކުޑައިރުއްސުރެ ބުދެއްގެ ގޮތުގައި ބަލަމުން އައީ ފްރާންސްގެ ލެޖެންޑް ޒިނެދިން ޒިދާނެވެ.
ކްލަބް ކެރިއަރުގެ ފެށުން: ލިލް
ހަޒާޑްގެ ކެރިއަރު ފެށުނީ އުމުރުން އެންމެ ހަތަރު އަހަރުގައި ރޯޔަލް ސްޓޭޑް ބްރޭނޯއިސް އިންނެވެ. އޭގެ ފަހުން އޭއެފްސީ ޓޫބިޒޭގައި ހުއްޓާ ފްރާންސްގެ ލިލްގެ ސްކައުޓުންނަށް އޭނާ ފާހަގަކުރެވި، އެ ކްލަބުގެ އެކަޑަމީއާ ގުޅުނެވެ. 2007 ވަނަ އަހަރު، އުމުރުން އެންމެ 16 އަހަރުގައި ލިލްގެ ސީނިއާ ޓީމަށް ކުޅެން ފެށި ހަޒާޑް، ވަރަށް އަވަހަށް ޓީމުގެ މުހިންމު ކުޅުންތެރިއަކަށް ވިއެވެ. އޭނާ ވެގެން ދިޔައީ ފްރާންސްގެ ލީގު 1 ގެ އެންމެ މޮޅު ޒުވާން ކުޅުންތެރިޔާގެ އެވޯޑް ޖެހިޖެހިގެން ދެ ފަހަރު ހޯދި ފުރަތަމަ ކުޅުންތެރިޔާއަށެވެ. 2010-11 ވަނަ އަހަރު އޭނާ ވަނީ ލިލްއަށް ލީގާއި ކަޕް ކާމިޔާބުކޮށްދީ، ލީގުގެ އެންމެ މޮޅު ކުޅުންތެރިޔާގެ މަގާމު ހޯދާފައެވެ.
ރަންޒަމާން: ޗެލްސީ
2012 ވަނަ އަހަރު ހަޒާޑް ޗެލްސީއަށް ބަދަލުވީ ދުނިޔޭގެ ސަމާލުކަން ހޯދަމުންނެވެ. ޗެލްސީގައި ހޭދަކުރި ހަތް އަހަރުގެ ތެރޭގައި އޭނާ ވަނީ ދެ ފަހަރު ޕްރިމިއާ ލީގު، ދެ ފަހަރު ޔޫރޮޕާ ލީގު، އެއް ފަހަރު އެފްއޭ ކަޕް އަދި އެއް ފަހަރު ލީގު ކަޕް ކާމިޔާބުކޮށްފައެވެ. 2014-15 ވަނަ އަހަރު އޭނާ ވަނީ ޕްރިމިއާ ލީގުގެ އެންމެ މޮޅު ކުޅުންތެރިޔާގެ އެވޯޑް ހޯދާފައެވެ. ޗެލްސީއަށް 110 ގޯލު ޖަހައިދީ، އޭނާ ވަނީ އެ ކްލަބުގެ ތާރީހުގައި ވެސް އުފެދުނު އެންމެ މޮޅު އެއް ކުޅުންތެރިޔާގެ ލަގަބު ހޯދާފައެވެ.
ރެއާލް މެޑްރިޑާއި ރިޓަޔަރުމަންޓް
2019 ވަނަ އަހަރު 150 މިލިއަން ޔޫރޯއާ ގާތްކުރާ ފީއަކަށް ރެއާލް މެޑްރިޑަށް ބަދަލުވުމަކީ ހަޒާޑްގެ ކެރިއަރުގެ އެންމެ ބޮޑު ނިންމުމެވެ. ނަމަވެސް، ތަކުރާރުކޮށް ކުރިމަތިވި އަނިޔާތަކުގެ ސަބަބުން އޭނާއަށް އެ ކްލަބުގައި އެންމެ އެދެވޭ ކުޅުމެއް ނުދެއްކުނެވެ. މެޗުތަކުގައި ކުޅުމުގެ ފުރުސަތު މަދުވުމާ ގުޅިގެން، 2023 ގައި އޭނާ ވަނީ ކްލަބު ދޫކޮށްލައި، އުމުރުން 32 އަހަރުގައި ފުޓްބޯޅައިން ރިޓަޔަރުކުރިކަން އިއުލާންކޮށްފައެވެ.
ބެލްޖިއަމްގެ ގައުމީ ޓީމު
ގައުމީ ޓީމަށް 126 މެޗު ކުޅެދީފައިވާ ހަޒާޑަކީ ބެލްޖިއަމްގެ ”ރަން ޖީލުގެ“ މުހިންމު ކެޕްޓަނެކެވެ. 2018 ވަނަ އަހަރުގެ ވޯލްޑް ކަޕްގައި ބެލްޖިއަމް ތިންވަނަ ހޯދިއިރު، އޭނާ ވަނީ މުޅި މުބާރާތުގެ ދެވަނައަށް އެންމެ މޮޅު ކުޅުންތެރިޔާގެ މަގާމު (ސިލްވަރ ބޯލް) ހޯދާފައެވެ. އޭނާގެ ކެޕްޓަންކަމުގެ ދަށުން ބެލްޖިއަމް ވަނީ ގިނަ ދުވަސްތަކެއް ވަންދެން ފީފާ ރޭންކިންގެ އެއްވަނައިގައި އޮވެފައެވެ
އީޑަން ހަޒާޑަކީ އޭނާގެ ހަލުވި ދުވެއްޔާއި، ބޯޅަ ހިފަހައްޓައިގެން ކުޅުންތެރިން ކައިރިން ނައްޓާލުމުގެ ތަފާތު ހުނަރުގެ ސަބަބުން ފުޓްބޯޅަ ސަޕޯޓަރުންގެ ހިތްތަކުން ދުވަހަކުވެސް ފިލައިގެން ނުދާނެ ނަމެކެވެ.