ޓާޓޫސް، ސީރިއާ: ސީރިއާގެ ޓާޓޫސް ސިޓީގައި ކުރިއަށްގެންދިޔަ ގައުމީ ބޯހިޔާވަހިކަމުގެ މަޝްރޫއެއްގެ ދަށުން އިމާރާތްކޮށްފައިވާ ފްލެޓްތަކުގައި ދިރިއުޅޭ ދިހަވަރަކަށް އާއިލާއަކަށް ކަރަންޓުގެ ޚިދުމަތް މެދުކެނޑިފައި އޮންނާތާ 8 މަސް ދުވަސް ވެއްޖެއެވެ.
މި މަޝްރޫއުގައި ދިރިއުޅޭ ހަމްޒާ އަލް ނާސިރު ބުނި ގޮތުގައި، އެ ސަރަހައްދުން ކަރަންޓް ކެނޑުމާ ގުޅިގެން އެމީހުންގެ ދިރިއުޅުން މިހާރު ވަނީ ވަރަށް ބޮޑަށް ދަތިވެފައެވެ. ”އަހަރެމެން މިވަނީ ހިލަ ޒަމާނަށް އެނބުރި ގޮސްފައި،“ ދިރިއުޅުމުގެ ހާލަތަށް އިޝާރާތް ކުރައްވައި އޭނާ ކަންބޮޑުވުމާއެކު ފާހަގަކުރިއެވެ. ހަމްޒާގެ އާއިލާއަކީ މި މަޝްރޫއުގައި ދިރިއުޅޭ ގާތްގަނޑަކަށް 70 އާއިލާގެ ތެރެއިން އެއް އާއިލާއެވެ. މި މައްސަލަ ކުރިމަތިވީ އެ ސަރަހައްދަށް ކަރަންޓް ފޯރުކޮށްދޭ މައި ކޭބަލް ވަގަށް ނެގި ހިސާބުންނެވެ.
މިދިޔަ ގަރުނުގެ ނުވަދިހަ ވަނަ އަހަރުގެ ކުރީކޮޅު ޓާޓޫސް ސިޓީގައި ފެށި ”ނޭޝަނަލް ހައުސިން“ މަޝްރޫއަކީ ސީރިއާގެ މިނިސްޓްރީ އޮފް ހައުސިން އެންޑް ވޯކްސްގެ ބެލުމުގެ ދަށުން ހިންގާ މަޝްރޫއެކެވެ. ”މިލިޓަރީ ހައުސިން އެސްޓޭބްލިޝްމަންޓް“ ގެ ނަމުން މަޝްހޫރުވެފައިވާ މި މަޝްރޫއުގައި 1166 އެޕާޓްމަންޓް ހިމެނެއެވެ.
ކަރަންޓް ނެތުމުގެ ސަބަބުން އާއިލާތަކުން އުފުލަމުންދާ ތަކުލީފުތަކާ ގުޅޭގޮތުން ”ސީރިއާ ނައު“ އަށް މައުލޫމާތު ދެމުން ހަމްޒާ ބުނީ، ފާއިތުވި ފިނި މޫސުމުގައި ހޫނު ހޯދުމަށްޓަކައި ލަކުޑި އަންދަން ޖެހުނު ކަމަށެވެ. އަދި މިހާރު ހޫނު މޫސުން ފެށިފައިވާއިރު، ފިނިކުރާނެ އެއްވެސް ވަސީލަތެއް ނެތުމުން މަދިރި އާއި އެކި ބާވަތުގެ ސޫފިތަކުގެ އުނދަގޫ އިންތިހާއަށް ބޮޑުވެފައިވާ ކަމަށް އޭނާ ބުންޏެވެ.
މި ސަރަހައްދުގެ އަނެއް ރައްޔިތެއް ކަމަށްވާ އަބްދުއްރަހުމާން މުސްތަފާ ޔަހްޔާ ބުނީ، މި ތަކުލީފު ތަހައްމަލު ކުރާތާ 8 މަސް ވެފައިވާއިރު، ކަރަންޓާ ބެހޭ ޖެނެރަލް ޑިރެކްޓަރޭޓަށް ގުޅުމުން ލިބެނީ ވަރަށް އާދައިގެ ޖަވާބެއް ކަމަށެވެ. އެގޮތުން 700 މީޓަރުގެ ކޭބަލް ހޯދުމަށް މަޑުކުރަން ޖެހޭ ކަމަށް އެ އިދާރާއިން ބުނާ ކަމަށް އޭނާ ފާހަގަކުރިއެވެ.
މި މައްސަލައާ ގުޅިގެން ޕްރޮޖެކްޓް މެނޭޖަރު ހުސެއިން ސައްލޫމް ”ސީރިއާ ނައު“ އަށް ދެއްވި ބަޔާނެއްގައި ވިދާޅުވީ، ޓްރާންސްފޯމަރު ސްޓޭޝަންތަކަށާއި، އިލެކްޓްރިކަލް ޕެނަލްތަކުގެ އިތުރުން ލިފްޓްތަކަށް ލިބިފައިވާ ގެއްލުންތައް ބަލައި، ވަގަށް ނަގާފައިވާ ތަކެތި އަލުން ހޯދުމުގެ މަސައްކަތް މިހާރު ފަށާފައިވާ ކަމަށެވެ. އަދި އެ ސަރަހައްދަށް ކަރަންޓް އަލުން ފޯރުކޮށްދިނުމަށް ބޭނުންވާ އިޖުރާއަތްތައް ކުރިއަށްދާ ކަމަށްވެސް އޭނާ ވިދާޅުވިއެވެ.
މި ހާދިސާ ހިނގާފައި މިވަނީ، ސީރިއާގެ އެކި ސަރަހައްދުތަކަށް ކަރަންޓް ފޯރުކޮށްދިނުމުގައި ބޮޑެތި ކުރިއެރުންތަކެއް ލިބެމުންދާ ދަނޑިވަޅެއްގައެވެ. ނަމަވެސް ޓާޓޫސްގެ މި އާއިލާތަކަށް އަދިވެސް މި އަސާސީ ޚިދުމަތުން މަހްރޫމްވެފައި ތިބެންޖެހުމަކީ އާންމުންގެ ބޮޑު ކަންބޮޑުވުމެކެވެ.