ފްރާންސްގެ ތަރި ކައިލިއަން އެމްބާޕޭ ކާމިޔާބުކުރި ދެ ލަނޑާއެކު، ފީފާ ވޯލްޑް ކަޕް 2026 ގެ ކޮލިފައިން ކެމްޕޭންގައި ސެނެގާލްގެ މައްޗަށް 3-1 ގެ ނަތީޖާއަކުން ފްރާންސް ކުރި ހޯދައިފިއެވެ. އެމެރިކާގެ ނިއުޔޯކް ނިއު ޖާޒީގައި ކުޅުނު މި ފޯރިގަދަ މެޗުގައި އެމްބާޕޭ ދެއްކި މޮޅު ކުޅުމާއެކު، އޭނާ މިވަނީ ފްރާންސްގެ ގައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާގެ ތާރީޚީ ރެކޯޑް މުގުރާލާފައެވެ.
މެޗުގެ ކުރީކޮޅު ސެނެގާލުން ވަނީ ފްރާންސްގެ ގޯލަށް ނުރައްކާތެރި ހަމަލާތަކެއް ފޮނުވާލާފައެވެ. އެގޮތުން ނިކޮލަސް ޖެކްސަން ފޮނުވާލި ހަމަލާއެއް ފްރާންސްގެ ކީޕަރު މައިކް މައިގްނާން ދިފާއުކުރި ނަމަވެސް، އެ ބޯޅަ ގޯލަށް ވަން ވަގުތު ޖެކްސަން ހުރީ އޮފްސައިޑްގައެވެ. މީގެ އިތުރުން ސެނެގާލްގެ އިސްމާއިލާ ސާރު އަށް ވެސް ލަނޑު ޖަހާނެ ރަނގަޅު ފުރުސަތެއް ލިބި ބޭކާރުވިއެވެ.
ފްރާންސުން މެޗުގެ ކޮންޓްރޯލް ހޯދަން ފެށީ ފުރަތަމަ ހާފު ނިމެން އުޅެނިކޮށް ޑެޒައި ޑޫ ފޮނުވާލި ނުރައްކާތެރި ހަމަލާއަކުންނެވެ. ސެނެގާލްގެ ކީޕަރު އެޑޯއާޑް މެންޑީ ވަނީ އެމްބާޕޭ އާއި މައިކަލް އޮލިސް ފޮނުވާލި ހަމަލާތައް ދިފާއުކުރުމުގައި މޮޅު ކުޅުމެއް ދައްކާފައެވެ. ނަމަވެސް މެޗުގެ 66 ވަނަ މިނެޓުގައި އޮލިސް ތަނަވަސްކޮށްދިން ފުރުސަތަކުން އެމްބާޕޭ ވަނީ ފްރާންސަށް ލީޑު ނަގައިދީ، އޮލިވިއާ ޖިރޫޑްގެ 57 ލަނޑުގެ ރެކޯޑާ އަރާ ހަމަކޮށްފައެވެ.
މެޗުގެ 82 ވަނަ މިނެޓުގައި ބަދަލު ކުޅުންތެރިޔާ ބްރެޑްލީ ބާކޯލާ ފްރާންސްގެ ދެވަނަ ލަނޑު ޖަހައިދިނެވެ. މެޗުގެ އިތުރު ވަގުތުގެ 5 ވަނަ މިނެޓުގައި ސެނެގާލްގެ އިބްރާހިމް އެމްބާޔޭ ލަނޑެއް ޖަހައި އުއްމީދު އާކޮށްދިން ނަމަވެސް، އޭގެ އެއް މިނެޓު ފަހުން އެމްބާޕޭ ވަނީ އޭނާގެ ދެވަނަ ލަނޑު ކާމިޔާބުކޮށް، ޖުމްލަ 58 ލަނޑާއެކު ފްރާންސްގެ ތާރީޚީ ރެކޯޑް އަމިއްލަ ނަމުގެ މައްޗަށް ލިޔެލާފައެވެ.
މި ކާމިޔާބީއާއެކު ފްރާންސްގެ ކެޕްޓަން ވަނީ 2002 ވަނަ އަހަރުގެ ވޯލްޑް ކަޕްގައި ސެނެގާލް އަތުން ފްރާންސް ބަލިވި ހިތްދަތި ހަނދާންތައް ފޮހެލާފައެވެ. އެމްބާޕޭގެ ދެން އޮތް އަމާޒަކީ ވޯލްޑް ކަޕްގެ ތާރީޚުގައި އެންމެ ގިނަ ލަނޑު ޖެހި މިރޮސްލާވް ކްލޯޒޭގެ 16 ލަނޑުގެ ރެކޯޑް މުގުރާލުމެވެ.
މި މެޗަކީ ފްރާންސްގެ ކޯޗު ޑިޑިއޭ ޑެޝަމްޕްސް ވޯލްޑް ކަޕްގައި އިރުޝާދުދިން 20 ވަނަ މެޗެވެ. މިއީ ދުނިޔޭގެ ތާރީޚުގައިވެސް އެންމެ ތިން ކޯޗަކަށް ނޫނީ ހާސިލްކުރެވިފައި ނުވާ ޝަރަފެކެވެ. މެޗުގެ މޮޅު ކުޅުންތެރިޔަކަށް ހޮވުނީ ފްރާންސްގެ މައިކަލް އޮލިސް އެވެ.