ހުޅަނގު މޮރިޓޭނިއާގެ ފުޅާ ފަޅުތެރޭގައި، ވެލިގަނޑު ނިމުމެއް ނެތި ދިގުވެ، މަގުތައް ދުރުމިނަށް ގެއްލިގެންދާ މަންޒަރަކީ އެކަހެރި ނަމަވެސް ހިތްގައިމު މަންޒަރެކެވެ. މި ސަރަހައްދުގައި ހުރި އޭނާގެ ސްޓްރޯ ޓެންޓުގެ ތެރޭގައި އިށީނދެގެން، ފާތިމަތު ޗެއިޚް މުހައްމަދު ބައުޔާ އިންތިޒާރު ކުރަމުންދަނީ އަލަށް ޒިޔާރަތްކުރާ މީހުން އައުމުގެ އުންމީދުގައެވެ. އުމުރުން 49 އަހަރުގެ މި އަންހެން މީހާގެ ދިރިއުޅުން ބިނާވެފައިވަނީ، ދުނިޔޭގެ ދަތުރުފަތުރުގެ ޗާޓުން ޒަމާނުއްސުރެ ބޭރުވެފައިވާ ގައުމަކަށް މަޑުމަޑުން އެނބުރި އަންނަ ފަތުރުވެރިކަމުގެ މައްޗަށެވެ
ނޫސްވެރިޔާ ޝޯލާ ލަވާލް ”އަލްޖަޒީރާ“ އަށް ލިޔެފައިވާ ރިޕޯޓެއްގައި ބަޔާންކޮށްފައިވާ ގޮތުން، މޮރިޓޭނިއާ އަކީ އެފްރިކާގެ އެންމެ ޝައުގުވެރި އެއް ފަތުރުވެރި މަންޒިލެވެ. މި ގައުމުގެ އެންމެ ފާހަގަކޮށްލެވޭ އެއް ތަނަކީ ”އެފްރިކާގެ ލޯ“ ނުވަތަ ”ރިޗަޓް ސްޓްރަކްޗާ“ އެވެ. އަދްރާރު ސަރަހައްދުގައި އޮންނަ 40 ކިލޯމީޓަރުގެ ދިގު މި ޖިއޮލޮޖިކަލް ފޯމޭޝަނަކީ އުޑުމަތިން ބަލާއިރު ބޮޑު ލޮލެއްގެ ބައްޓަމަށް ފެންނަ ތަނެކެވެ. ގިނަ ބަޔަކު މިތަން ގުޅުވަނީ ގެއްލިފައިވާ ”އެޓްލާންޓިސް“ ގެ ހަޟާރަތާއެވެ.
މޮރިޓޭނިއާގެ ފަތުރުވެރިކަމަށް 2000 ވަނަ އަހަރުގެ ކުރީކޮޅު ރަންޒަމާނެއް އައެވެ. އެ ދުވަސްވަރު އަހަރަކު 30,000 އެއްހާ ފަތުރުވެރިން، ހާއްސަކޮށް ފްރާންސުން، އެ ގައުމަށް ޒިޔާރަތްކުރިއެވެ. ނަމަވެސް ”އަލްގައިދާ“ ފަދަ ޖަމާއަތްތަކުން ދިން ހަމަލާތަކާ ގުޅިގެން މި ދާއިރާ މުޅިން ފުނޑުފުނޑުވިއެވެ. މަޝްހޫރު ”ޑަކާ ރެލީ“ މެދުއިރުމައްޗަށް ބަދަލުވެ، ފަތުރުވެރިންގެ އައުން ހުއްޓުނެވެ.
މި ހާލަތުން އަރައިގަތުމަށް މޮރިޓޭނިއާ ސަރުކާރުން ވަނީ ހަރުކަށި ފިޔަވަޅުތަކެއް އަޅާފައެވެ. ބޯޑަރު ސަރަހައްދުތަކުގައި އެލައިޓް އަސްކަރީ ޔުނިޓްތައް ބަހައްޓައި، ހަރުކަށި ފިކުރުތަކާ ދެކޮޅަށް ދީނީ އަދި އިޖުތިމާއީ ގޮތުން މަސައްކަތްތަކެއް ވަނީ ކޮށްފައެވެ. އަސާސީ ހިދުމަތްތައް ރަށްފުށަށް ފޯރުކޮށްދީ، ފަގީރުކަން ނައްތާލުމަށް ކުރި މަސައްކަތުގެ ނަތީޖާއެއްގެ ގޮތުން 2018 އާއި 2019 އާ ދެމެދު ފަތުރުވެރިންގެ އަދަދު %166 އިތުރުވިއެވެ.
މިއަދު މޮރިޓޭނިއާ އިން މަސައްކަތް ކުރަމުންދަނީ ތަފާތު ”އެޑްވެންޗާ“ މަންޒިލެއްގެ ގޮތުގައި ދުނިޔެއަށް ދައްކާލުމަށެވެ. 640 ކިލޯމީޓަރުގެ ދިގު ”ދަގަނޑު ރޭލު“ ގެ ދަތުރަކީ މިހާރު ސޯޝަލް މީޑިއާގައި މަގުބޫލުވަމުންދާ ކަމެކެވެ. ބައެއް ފަތުރުވެރިން އިންފްރާސްޓްރަކްޗާ ދަށްވުމުގެ ޝަކުވާ ކުރި ނަމަވެސް، މި ގައުމުގެ ”ސައްހަ އަދި ސާފު“ ތަޖުރިބާއަށް ގިނަ ބަޔަކު ތައުރީފު ކުރެއެވެ.
ވެރިރަށް ނޫއަކްޝޮޓްގައި ބައިނަލްއަގުވާމީ ހޮޓާ ފަދަ ތަންތަން ހުޅުވި، ޒަމާނީ ބަދަލުތައް ފެންނަން ފަށާފައިވާއިރު، ފާތިމަތު ބައުޔާ ފަދަ އާންމު ރައްޔިތުން އަދިވެސް ތިބީ އުންމީދާއެކު ފަޅުގެ ހިތުގައެވެ. އޭނާ ބުނާ ގޮތުގައި މިހާރު ފަތުރުވެރިންނަކީ ހަމައެކަނި ޒިޔާރަތްކުރާ ބައެއް ނޫނެވެ؛ އެއީ އެމީހުންގެ އާމްދަނީގެ މައިގަނޑު މަސްދަރެވެ. މޮރިޓޭނިއާ މިއަދު އޮތީ ހަލަބޮލި މާޒީއަކާއި، އުންމީދީ މުސްތަގުބަލެއްގެ ހުރަސްމަގުގައެވެ.
ހަސަން އަރީން (އެޑީ)