ވޯލްޑް ކަޕް ފަސް ފަހަރު ކާމިޔާބުކޮށްފައިވާ ބްރެޒިލް، މިފަހަރުގެ މުބާރާތުގައި އެ ގައުމުގެ އާ ޖާޒީގައި ކުޅުނު ފުރަތަމަ މެޗުގައި މޮރޮކޯއާ ދެކޮޅަށް ނުކުމެ އެއްވަރުވެއްޖެއެވެ. ނިއު ޖާޒީގެ ސްޓޭޑިއަމްގައި ކުޅުނު މި މެޗުގައި ބްރެޒިލްއަށް މޮޅު ނަތީޖާއެއް ހޯދައިދިނުމަށް އެންމެ ބޮޑު މަސައްކަތެއް ކުރީ ޒުވާން ތަރި ވިނިޝިއަސް ޖޫނިއާ އެވެ.
ގްރޫޕް ސީގެ މި ފޯރިގަދަ މެޗުގެ 21 ވަނަ މިނެޓުގައި މޮރޮކޯއިން ވަނީ ލީޑު ނަގާފައެވެ. މި ގޯލު އެ ގައުމަށް ކާމިޔާބުކޮށްދިނީ ހުޝިޔާރު ސްކޫޕަކުން އިސްމާއީލް ސައިބާރީ އެވެ. ނަމަވެސް، މޮރޮކޯގެ މި އުފާވެރިކަން މާގިނަ އިރަކު ދެމިއޮތަނުދީ، ވިނިޝިއަސް ވަނީ ސިހުރުވެރި ކުޅުމެއް ދައްކައި، ބްރެޒިލްއަށް ޕޮއިންޓެއް ކަށަވަރުކޮށްދީފައެވެ.
އެންމެ ފަހުން ބްރެޒިލްއިން ވޯލްޑް ކަޕްގެ ތަށި އުފުލާލިތާ 24 އަހަރު ފަހުން، ރެކޯޑް ހަ ވަނަ ފަހަރަށް ޗެމްޕިއަންކަން ހޯދުމަށް އެ ގައުމުން އަމާޒު ހިފާފައިވީ ނަމަވެސް، މި މެޗުގައި ފެނިގެންދިޔަ ކުޅުމުން އެނގިގެންދަނީ ކޯޗު ކާލޯ އެންޗެލޯޓީގެ ޓީމުން ކުރަން ޖެހޭ މަސައްކަތްތައް އަދިވެސް ގިނަކަމެވެ. މިއީ ބިދޭސީ ކޯޗެއްގެ އިރުޝާދުގެ ދަށުން ބްރެޒިލް ވޯލްޑް ކަޕެއްގައި ކުޅޭ ފުރަތަމަ ފަހަރެވެ.
މި މެޗު ބަލާލުމަށް ބްރެޒިލްގެ ކުރީގެ ތަރިން ކަމަށްވާ ރޮނާލްޑޯ، ރޮބާޓޯ ކާލޯސް އަދި ކާކާ ފަދަ ލެޖެންޑުން ސްޓޭޑިއަމަށް ހާޒިރުވެ ތިއްބެވެ. އެންޗެލޯޓީއަށް އޮތް ގޮންޖެހުން ބޮޑުވީ، ދެކުނު އެމެރިކާގެ ކޮލިފައިންގައި ބްރެޒިލް ފަސް ވަނައަށް ދިއުމުންނެވެ. އަދި އަނިޔާގެ ސަބަބުން 2023 އިން ފެށިގެން ކުޅުމާ ދުރުގައި ހުރި ނޭމާ ނުލައި މުބާރާތާ ކުރިމަތިލާން ޖެހުމަކީވެސް އިތުރު އުނދަގުލެކެވެ. އެހެންނަމަވެސް، އެންޗެލޯޓީ ބުނަމުން އަންނަނީ 48 ޓީމު ބައިވެރިވާ މި މުބާރާތުގައި ކޮންމެ ޓީމަކާ ވާދަކުރެވޭނެ ފެންވަރުގެ ސްކޮޑެއް ބްރެޒިލް އަތުގައި އެބައޮތް ކަމަށެވެ.
މޮރޮކޯގެ ކޯޗު މުހައްމަދު އުއާބީގެ އިރުޝާދުގެ ދަށުން، އެ ޓީމުން ވަނީ ބްރެޒިލަށް ބިރުނުގަނެ ވަރުގަދަ ކުޅުމެއް ދައްކާފައެވެ. ނީލް އެލް އައިނައުއީ އާއި އަޗްރަފް ހަކީމީގެ ނުރައްކާތެރި ހަމަލާތަކަށްފަހު، ސައިބާރީ ގޯލު ޖެހީ ބްރާހިމް ޑިއާޒް ދިން ރީތި ޕާހަކުންނެވެ. އޭނާ ވަނީ ބްރެޒިލްގެ ޑިފެންޑަރުން ކަމަށްވާ މާކިންހޯސް އާއި ގެބްރިއަލް މަގަލްހޭސް ކައިރިން ނައްޓާލުމަށްފަހު، ކީޕަރު އެލިސަން ބެކަރގެ ބޯމަތިން ބޯޅަ ގޯލަށް ފޮނުވާލާފައެވެ.
ބްރެޒިލް އެއްވަރުކޮށްދިނީ މީގެ 11 މިނެޓް ފަހުން ވިނިޝިއަސް އެވެ. ބްރޫނޯ ގުއިމަރޭސް ދިން ބޯޅައެއް ކޮންޓްރޯލް ކުރުމަށްފަހު، ރެއާލް މެޑްރިޑްގެ ތަރި ވަނީ މޮރޮކޯގެ ކީޕަރު ޔާސީން ބައުނޫއަށް ފުރުސަތެއް ނުދީ ގޯލުގެ ދުރު ކަނަށް ބޯޅަ ފޮނުވާލާފައެވެ.
މެޗުގެ ފަހުބައިގައި ބްރެޒިލުން މޮޅުވާން ގިނަ މަސައްކަތްތަކެއް ކުރިއެވެ. ލޫކަސް ޕަކެޓާގެ އެކްރޮބެޓިކް ހަމަލާއެއް ބައުނޫ ދިފާއުކުރިއިރު، ރަފިންހާ އާއި ޑެނިލޯގެ ހަމަލާތައްވެސް ކާމިޔާބެއް ނުވިއެވެ. މެޗު ނިމެން ދަނިކޮށް މޮރޮކޯއަށް މޮޅުވާން ރަނގަޅު ފުރުސަތެއް ލިބުނު ނަމަވެސް، އެލިސަން ވަނީ ހުޝިޔާރުކަމާއެކު އެ ބޯޅަތައް ހުއްޓުވާފައެވެ.
މި މުބާރާތުގެ ދެވަނަ މެޗުގައި ބްރެޒިލް ނުކުންނާނީ ހޭޓީއާ ދެކޮޅަށެވެ. އަދި މޮރޮކޯ ނުކުންނާނީ ސްކޮޓްލޭންޑާ ދެކޮޅަށެވެ.
ނޫސްވެރިޔާ