ފީފާ ވޯލްޑް ކަޕް: ސްޕެއިންގެ ފުރަތަމަ މެޗުގައި ޔަމާލް ކުޅޭނެތޯ؟ ކޯޗުގެ ޖަވާބު

އެންމެ ފަހުގެ ޔޫރަޕްގެ ޗެމްޕިއަން ސްޕެއިން އިން 2026 ވަނަ އަހަރުގެ ފީފާ ވޯލްޑް ކަޕަށް ތައްޔާރުވަމުންދާއިރު، އެންމެ ބޮޑު ސުވާލަކަށް ވެފައިވަނީ އެ ޓީމުގެ ޒުވާން ތަރި ލަމީނޭ ޔަމާލް ފުރަތަމަ މެޗުގައި ފެންނާނެތޯ އުފެދިފައިވާ ސުވާލެވެ.

އުމުރުން 18 އަހަރުގެ ބާސެލޯނާގެ ވިންގާ ޔަމާލް މިވަގުތު ހުރީ އަނިޔާއެއްގެ ސަބަބުން ކުޅުމާ ދުރުގައެވެ. އޭނާ މިދިޔަ ހަފްތާއެއްހާ ދުވަހު ރިހެބިލިޓޭޝަންގެ މަސައްކަތް ކުރަމުން އަންނައިރު، އަންނަ ޖޫން މަހުގެ 15 ވަނަ ދުވަހު އެޓްލާންޓާ ސްޓޭޑިއަމްގައި ކެޕް ވަރޑޭއާ ދެކޮޅަށް ކުޅޭ ގްރޫޕް އެޗްގެ ފުރަތަމަ މެޗުގައި އޭނާ ފެނުމަކީ ސްޕެއިންގެ ސަޕޯޓަރުން އިންތިޒާރު ކުރަމުންދާ ކަމެކެވެ.

މިކަމާ ގުޅޭގޮތުން މީޑިއާއާ ވާހަކަ ދައްކަވަމުން ސްޕެއިންގެ ކޯޗު ލުއިސް ޑި ލާ ފުއެންޓޭ ބުނީ، ޔަމާލްގެ ހާލަތު އުންމީދު ކުރި ވަރަށް ވުރެ ބާރަށް ރަނގަޅުވަމުން އަންނަ ކަމަށެވެ. ނަމަވެސް، އޭނާ މެޗަށް ނެރުމުގައި ޓެކްނިކަލް ސްޓާފުން އިންތިހާއަށް ސަމާލުވާނެ ކަމަށް ކޯޗު ފާހަގަކުރިއެވެ.

”އޭނާ ރަނގަޅުވަމުން އަންނަނީ ވަރަށް ބާރަށް، އަހަރެމެން ކަނޑައެޅި ޓާގެޓަށް ވުރެ ވެސް ކުރިން. އަހަރެންނަށް ހީވަނީ ފުރަތަމަ މެޗު ކުޅެވޭނެހެން، އެކަމަކު އޭގެ މާނައަކީ އޭނާ ކުޅޭނެއެކޭ ނޫން. ކުޅެން ނުޖެހޭތޯ ނުވަތަ ދެވަނަ މެޗަށް މަޑުކުރަން ޖެހޭތޯ އަހަރެމެން އިވެލުއޭޓް ކުރާނަން،“ ޑި ލާ ފުއެންޓޭ ބުންޏެވެ.

ކޯޗު އިތުރަށް ބުނީ މެޑިކަލް ޓީމުން ދީފައިވާ ވަގުތަށް ވުރެ އަވަހަށް ޔަމާލް ރަނގަޅުވަމުން އައި ނަމަވެސް، އޭނާއަށް އިތުރު އަނިޔާއެއް ލިބިދާނެ ފަދަ އެއްވެސް ރިސްކެއް ނުނަގާނެ ކަމަށެވެ.

ޔަމާލްގެ މައްޗަށް އޮތް ބޮޑު ސަމާލުކަމާ ގުޅޭގޮތުން ވާހަކަ ދައްކަމުން ކޯޗު ބުނީ، ޒުވާން ޔަމާލަކީ މިފަދަ ބޮޑު ޕްރެޝަރަކާ ކުރިމަތިލުމުގެ ގާބިލްކަން ހުރި ”ހާއްސަ“ ކުޅުންތެރިއެއް ކަމަށެވެ. ”ލަމީން އުފަންވީ މިކަމަށްޓަކައި. އޭނާގެ ކިބައިގައި ކެރިގެން ކުރިމަތިލާނެ ފަދަ ސިފަތަކެއް އެބަހުރި. މިފަދަ ޕްރެޝަރަކީ އަހަރެމެންނަށް އުނދަގޫ ކަމަކަށް ވިޔަސް، އޭނާ ފަދަ ކުޅުންތެރިންނަށް އެއީ އާދައިގެ ކަމެއް،“ ކޯޗު އިތުރަށް ބުންޏެވެ.

ލުއިސް ޑި ލާ ފުއެންޓޭ ވަނީ ޔަމާލްގެ ވަށައިގެން އޮތް ހައިޕް ބޮޑުވި ނަމަވެސް، އޭނާ ހަމަބިމުގައި ހުރެ، އަސާސީ ކަންކަމަށް ސަމާލުކަން ދިނުމަށް އެދިފައެވެ. އަދި އޭނާ ބޭނުންވަނީ ޔަމާލްގެ ފައިގެ ހުނަރާއި ހިތުގެ ވަރުގަދަކަން ދުނިޔެއަށް ދައްކާލުމަށް ކަމަށް ވެސް ކޯޗު ފާހަގަކުރިއެވެ.

ސްޕެއިންގެ ސަޕޯޓަރުން މިހާރު އިންތިޒާރު ކުރަމުންދަނީ، ވޯލްޑް ކަޕްގެ ފުރަތަމަ މެޗުގައި މި ޒުވާން ތަރި ފެނިގެންދާނެތޯ ބެލުމަށެވެ.