2026 ވަނަ އަހަރުގެ ފީފާ ވޯލްޑް ކަޕަށް ނެދަލެންޑްސް ކުރިމަތިލާއިރު، މިއީ އެ ގައުމުގެ ފުޓްބޯޅަ ތާރީޚުގައި އާ ސަފުހާއެއް ލިޔުމަށް ލިބޭ ރަނގަޅު ފުރުސަތެކެވެ. މީގެ ކުރިން 11 ފަހަރު ވޯލްޑް ކަޕްގައި ވާދަކޮށްފައިވާ ނެދަލެންޑްސް ވަނީ ތިން ފަހަރެއްގެ މަތިން (1974، 1978 އަދި 2010) މުބާރާތުގެ ފައިނަލުގައި ކުޅެފައެވެ. ނަމަވެސް، ކޮންމެ ފަހަރަކުވެސް ރަނަރަޕްގެ މަގާމުން ފުއްދާލަން ޖެހުމަކީ އެ ގައުމުގެ ސަޕޯޓަރުންނަށް އޮތް ބޮޑު މާޔޫސްކަމެކެވެ.
ފީފާ ރޭންކިންގެ 7 ވަނައިގައި އޮތް ނެދަލެންޑްސް މިފަހަރުގެ މުބާރާތަށް ކޮލިފައިވީ ކުޅުނު އަށް މެޗުންވެސް ބަލިނުވެ، ވަރުގަދަ ނަތީޖާތަކަކާއެކުގައެވެ.
ބަލަންޖެހޭ މުހިންމު ކުޅުންތެރިޔާ: ޓިޖާނީ ރެއިންޑަރސް
މިފަހަރުގެ ޓީމުގައި އެންމެ ބޮޑަށް ފާހަގަކޮށްލެވޭ ކުޅުންތެރިޔަކީ މެންޗެސްޓާ ސިޓީގެ މިޑްފީލްޑަރު ޓިޖާނީ ރެއިންޑަރސް އެވެ. އޭސީ މިލާނުގައި ދެއްކި މޮޅު ކުޅުމަށްފަހު 2025 ވަނަ އަހަރު ސިޓީއާ ގުޅުނު ރެއިންޑަރސް އަކީ މިހާރު ޔޫރަޕްގެ އެންމެ ނުފޫޒުގަދަ އެއް މިޑްފީލްޑަރެވެ. އޭނާ އަކީ ޑިފެންސާއި އެޓޭކް ގުޅުވައިދިނުމުގައި މުހިންމު ދައުރެއް އަދާކުރާ، ޓީމުގެ ”ހިތުގެ ތެޅުން“ ކަމަށް ގިނަ ބަޔަކު ގަބޫލުކުރެއެވެ.
ޓީމުގެ ވަރުގަދަ ކޯ އަދި ކަންބޮޑުވުންތައް
ރޮނާލްޑް ކޯމަން ދެވަނަ ފަހަރަށް ގައުމީ ޓީމާ ހަވާލުވެ ހުރިއިރު، އޭނާގެ އަމާޒަކީ 1988 ވަނަ އަހަރުގެ ޔޫރޯ ކާމިޔާބީއަށްފަހު ނެދަލެންޑްސްއަށް ބޮޑު މުބާރާތެއްގެ ތަށި ހޯދައިދިނުމެވެ. އޭނާގެ އިރުޝާދުގެ ދަށުން ޓީމުގެ ރޫހު މިހާރު ފެންނަނީ ވަރަށް ބަދަހިކޮށެވެ.
ގްރޫޕް ސްޓޭޖުގެ މެޗުތައް
ގްރޫޕް އެފްގައި ނެދަލެންޑްސް ވާދަކުރަން ޖެހެނީ ޖަޕާން، ސްވިޑެން އަދި ޓިއުނީޝިއާ އާއެވެ.
- ޖޫން 14: ނެދަލެންޑްސް – ޖަޕާން (ޑަލަސް)
- ޖޫން 20: ނެދަލެންޑްސް – ސްވިޑެން (ހޫސްޓަން)
- ޖޫން 24: ޓިއުނީޝިއާ – ނެދަލެންޑްސް (ކެންސަސް ސިޓީ)
ނެދަލެންޑްސްގެ ސްކޮޑް (ޚުލާސާ):
- ކީޕަރުން: ބާޓް ވަރބްރޫގޭން، ރޮބިން ރޯފްސް، މާކް ފްލެކެން.
- ޑިފެންޑަރުން: ވެން ޑައިކް، އޭކޭ، ޑަމްފްރީސް، ޓިމްބަރ، ވެން ޑި ވެން.
- މިޑްފީލްޑަރުން: ފްރެންކީ ޑި ޖޮންގް، ރެއިންޑަރސް، ގްރެވެންބަރޗް، ކޫޕްމައިނަރސް.
- ފޯވާޑުން: ގަކްޕޯ، ޑެޕޭ، މާލެން، ވެގޯރސްޓް، ސަމަރވިލް
ހަސަން އަރީން (އެޑީ)