މެދުއިރުމަތީގެ ސުލްހައަށް ކުރާ ކޮންމެ ކަމަކުން މަގު ފަހިވާން ޖެހޭނީ ފަލަސްތީނުގެ މިނިވަން ދައުލަތެއް އުފެއްދުމަށް ކަމަށް އިނގިރޭސި ވިލާތުގެ ބޮޑުވަޒީރު ކިއާ ސްޓާމާ، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަށް ދަންނަވައިފިއެވެ.
އިނގިރޭސި ވިލާތުގެ ސަރުކާރުގެ ތަރުޖަމާނެއްގެ ބަހުން، ދެ ލީޑަރުން ފޯނުން ވާހަކަދެއްކެވީ ޣައްޒާގައި އިޒްރޭލާއި ހަމާސް އިން ހަމަލާތައް ހުއްޓާލުމަށް ވެފައިވާ ”ނާޒުކު އެއްބަސްވުމާ ބެހޭ ގޮތުން“ ކަމަށް ބުނެފައިވެއެވެ. މި ވާހަކަތަކުގައި ދެ ބޭފުޅުންވެސް އެއްބަސްވެވަޑައިގެންނެވީ އިޒްރޭލުގެ ސަލާމަތާއި ހަމަޖެހުން ކަށަވަރުކޮށްދޭ ދާއިމީ އަދި ސުލްހަވެރި ހައްލަކަށް މަސައްކަތްކުރަން ޖެހޭ ކަމަށެވެ.
ބޮޑުވަޒީރު ސްޓާމާ ވިދާޅުވެފައިވަނީ މިކަމުގައި ސިޔާސީ ގޮތުން ކުރަންޖެހޭ ކޮންމެ ކަމަކަށް އެއްބާރުލުން ދޭނެ ކަމަށާއި އެކަމުގެ ސަބަބުން ވެސް ފަލަސްތީނުގެ ހަރުދަނާ އަދި ސިޔާދަތީ ދައުލަތަކަށް މަގުފަހިވާން ޖެހޭ ކަމަށެވެ.
މީގެ އިތުރުން، ޣައްޒާއަށް އިންސާނީ އެހީތެރިކަން މެދުކެނޑުމެއްނެތި ފޯރުވައި، ފަލަސްތީނަށް އެހީތެރިކަން ފޯރުކޮށްދިނުމުގެ މުހިންމުކަންވެސް ސްޓާމާ ތަކުރާރުކޮށް ވިދާޅުވިކަމަށް ޑައުނިންގ ސްޓްރީޓުން ބުނެފައިވެއެވެ.
މި ވާހަކަތަކަކީ މެދުއިރުމަތީގެ ހަމަނުޖެހުންތަކަށް ހައްލެއް ހޯދުމަށް ބައިނަލްއަޤްވާމީ މުޖުތަމަޢުން ކުރަމުންދާ މަސައްކަތްތަކުގެ ބައެއްގެ ގޮތުގައި ބެލެވެއެވެ. އިނގިރޭސި ވިލާތުން މިފަދަ ބާރުލުމެއް ދިނުމަކީ ސަރަހައްދުގެ ސުލްހައަށް އިތުރު ހިތްވަރެއް ލިބިގެންދާނެ ކަމެއް ކަމަށް ސިޔާސީ ތަހުލީލުވެރިން ދެކެއެވެ.
ޔޫސުފް ޔޫޝަޢު