ފަލަސްތީނުގެ ޢައްޒާއަށް އިޒްރޭލުން ދެމުންގެންދާ ހަމަލާތައް ހުއްޓާލުމަށާއި ހަމާސްއިން ރަހީނުކޮށްފައިވާ އިޒްރޭލު މީހުން މިނިވަން ކުރަން ދެފަރާތުން އެއްބަސްވެއްޖެއެވެ.
މި އެއްބަސްވުމުގެ މައުލޫމާތު އެނގޭ އޮފިޝަލަކާ ހަވާލާދީ ރޮއިޓާސްގައި ރިޕޯޓުކޮށްފައިވާ ގޮތުން ހަމަލާތައް ހުއްޓާލުމާ ގުޅިގެން ދެފަރާތުން އެއްބަސްވުމަކަށް އައިކަން ކަށަވަރުވެފައި ވަނީ މިއަދެވެ.
އެމެރިކާގެ އިންތިޚާބީ ރައީސް ޑޮލަންޑް ޓްރަމްޕް ވެސް ވަނީ މިކަން އިއުލާނު ކުރައްވައި، މަރުހަބާ ވިދާޅުވައެވެ.
ދާދިދެންމެއަކު ޓްރަމްޕް އިއުލާން ކުރެއްވިގޮތުގައި އިސްރާއީލުން މިކަމަށް އެއްބަސްވެފައިވަނީ އެމެރިކާ، މިސްރު އަދި ގަތަރު މެދުވެރިއަކަށް ވެގެން އިސްރާއީލާއި ހަމާސް ޖަމާއަތުން ނުސީދާ ގޮތެއްގައި ގަތަރުގެ ވެރިރަށް ދައުހާގައި ކުރިޔަށްދިޔަ ވާހަކަތަކުގައެވެ.
މި މހަމަލާތައް ނިންމާލަން އިޒްރޭލުން އެއްބަސްވެފައި ވަނީ ހަނގުރާމައަށް 15 މަސް ވީފަހުންނެވެ. މި ހަނގުރާމަ ފަށާފައި ވަނީ، 2023ވަނަ އަހަރުގެ އޮކްޓޯބަރު މަހުގެ ހަތްވަނަ ދުވަހު ހަމާސްއިން ދިން ކުއްލި ހަމަލާއަކަށް ރައްދު ދިނުމުގެ ގޮތުންގެވެ.
ޢައްޒާގެ ހެލްތު މިނިސްޓްރީގެ ތަފަސްހިސާބުތައް ދައްކާގޮތުން މި ހަނގުރާމައިގައި ޢައްޒާގެ 46،000އަށްވުރެ ގިނަ މީހުން ޝަހީދުކޮށްލަފައި ވެއެވެ.
މީގެ ކުރިން ވެސް މިފަދަ އެއްބަސްވުންތައް އިޒްރޭލުން ވަނީ އެކުލަވާލާފައެވެ. ނަމަވެސް އިޒްރޭލުން އެ އެއްބަސްވުންތަކަށް ތަބާވެފައެއް ނުވެއެވެ.