ރަޝިޔާގެ ވައިގެ ދިފާއީ ބާރުތަކުން ދިން ހަމަލާތަކުގެ ސަބަބުން ވެއްޓުނު ކަމަށް ބެލެވޭ އަޒަރްބައިޖާނުގެ މަތިންދާބޯޓަށް ހަމަލޓަށް ހަމަލާ ދިން މީހުންނަށް އަދަބު ދޭނެ ކަމުގެ ޔަގީންކަން ރަޝިޔާއިން ދީފައިވާ ކަމަށް އަޒަރްބައިޖާނުން ބުނެފިއެވެ.
މި މަހުގެ 25 ވަނަ ދުވަހު ކަޒަކިސްތާނަށް ދަތުރުކުރަމުންދިޔަ އަޒާލް އެމްބްރޭއާ 190 ޖެޓް ވެއްޓުނު ހާދިސާގައި 38 މީހުން މަރުވިއެވެ. މި ހާދިސާއާ ގުޅިގެން އަޒަރްބައިޖާންގެ ރައީސް އިލްހާމް އަލިިލްހާމް އަލިޔޭވް ވަނީ ރަޝިޔާއިން މި ހާދިސާގެ ޒިންމާ އުފުލުމަށް ގޮވާލާފައެވެ.
އަޒަރްބައިޖާންގެ ޕްރޮސެކިއުޓާ ޖެނެރަލް ބުނާ ގޮތުގައި ރަޝިޔާގެ ތަހުގީގީ ކޮމިޓީގެ ވެރިޔާ ވަނީ ކުށްވެރިވާ މީހުން ދެނެގަނެ ޒިންމާކުރުވާނެ ކަމަށް ބުނެފައެވެ. އަދި ރަޝިޔާއިން މިހާރު ވަނީ މި މައްސަލައިގައި ޖިނާއީ ތަހުގީގެއް ފަށާފައިވާ ކަމަށްވެސް އޭނާ ވިދާޅުވިއެވެ.
ނަމަވެސް، ރަޝިޔާއިން އަދި މި ހާދިސާގައި މަތިންދާބޯޓަށް އަމާޒުވީ ވައިގެ ދިފާއީ މިސައިލެއްކަން ކަށަވަރުކޮށްދީފައެއް ނުވެއެވެ. ރަޝިޔާގެ ރައީސް ވްލަދިމިއާ ޕޫޓިން ވަނީ މިއީ އެއާ ޑިފެންސް ސިސްޓަމް އެކްޓިވޭޓްކޮށްފައި ހުރި ވަގުތެއްގައި ހިނގި ހާދިސާއެއް ކަމަށް ބުނެ، ދިމާވި ކަންތަކާ މެދު ހިތާމަކުރައްވާ ކަމަށް ވިދާޅުވެފައެވެ. ނަމަވެސް ހަމަލާގެ ޒިންމާއެއް ނުނަންގަވައެވެ.
އަޒަރްބައިޖާންގެ ރައީސް އަލިޔޭވް ވިދާޅުވެފައިވަނީ މިއީ އެކްސިޑެންޓެއް ކަމަށް އެނގޭ ނަމަވެސް، މައްސަލައަކީ ރަޝިޔާއިން މިކަން ފޮރުވަން މަސައްކަތްކުރުން ކަމަށެވެ.
މި ހާދިސާއާ ގުޅިގެން ދެ ގައުމުގެ ދެމެދުގައި އޮތް ގުޅުމަށް އަސަރުކޮށްފައިވާކަން ފާހަގަކުރެވެއެވެ. އަޒަރްބައިޖާނުން ވަނީ މި ހާދިސާއާ ގުޅިގެން ރަޝިޔާއަށް ވަރަށް ބޮޑަށް ފާޑުކިޔާފައެވެ. މި މައްސަލައިގެ ތަހުގީގު ކުރިއަށްދާ ގޮތާއި، ރަޝިޔާއިން މިކަމާ މެދު އަޅާ ފިޔަވަޅުތަކަށް ބައިނަލްއަޤްވާމީ މުޖުތަމަޢުގެ ސަމާލުކަން ހުންނާނެ ކަމަށް ބެލެވެއެވެ.