ގޯލްޑް ކަޕްގެ ގުރޫޕް ސީގައި މިއަދު ހަވީރު ކުޅުނު މެޗުގައި ކ. ހުރާ 3-1 އިން ބަލިކޮށް، 36 އަހަރުގެ ތާރީޚަކަށް ގުރައިދޫއިން ނިމުމެއް ގެނެސްފިއެވެ. މިއީ 1988 ގެ ފަހުން ހުރާގެ މައްޗަށް ގުރައިދޫއިން ހޯދި ފުރަތަމަ މޮޅެވެ.
ގުރައިދޫގެ ފުރަތަމަ ދެ ލަނޑު ޖެހީ މެޗުގެ ފުރަތަމަ ހާފުގެ ފަހު ފަސް މިނެޓް ތެރޭގައެވެ. ފުރަތަމަ ލަނޑު އިމްއާދު އަބްދުލް ގައްޔޫމް ޖެހީ ނާއިޝް އާދަމް ތަނަވަސްކޮށްދިން ފުރުސަތަކުންނެވެ. ދެވަނަ ލަނޑު އިޝްއާފް މުހައްމަދު ފިރާގް ޖެހީ 45 ވަނަ މިނެޓްގައެވެ.
ދެވަނަ ހާފުގެ ކުރީކޮޅުގައި އިމްއާދު އޭނާގެ ދެވަނަ ލަނޑު ޖަހައިފައިވެއެވެ. ހުރާގެ ހަމައެކަނި ލަނޑު 73 ވަނަ މިނެޓްގައި ޖެހީ މުހައްމަދު ތަޝްމީން (ތައްތި) އެވެ.
ގުރައިދޫގެ ކުރީގެ ކުޅުންތެރިން ބުނާ ގޮތުގައި 1988 ގެ ފަހުން މިއަދާ ހަމައަށް، ގުރައިދޫއަށް ހުރާ ބަލިކުރެވިފައެއް ނުވެއެވެ. މާލޭގައި ފުރަތަމަ ޑިވިޝަނުގައި ދެ ރަށުގެ ކްލަބުތައް އަހަރުތަކެއް ވަންދެން ކުޅުނު އިރުވެސް ހުރާގެ ކްލަބުގެ މައްޗަށް ގުރައިދޫ ޓީމަށް މޮޅެއް ހޯދިފައެއް ނުވެއެވެ.
މި މޮޅާއެކު ގުރައިދޫއިން ވަނީ 36 އަހަރުގެ ދިގު ތާރީޚަކަށް ނިމުމެއް ގެނެސްފައެވެ.