ފަލަސްތީނުގެ ޣައްޒާގައި އިޒްރޭލުން މިއަދު ދިން ހަމަލާއެއްގައި 30 މީހަކު ޝަހީދުވެފައިވާ ކަމަށް ޣައްޒާގެ ސިވިލް ޑިފެންސް އޭޖެންސީން ބުނެފިއެވެ. މި ހަމަލާގައި ޝަހީދުވި މީހުންގެ ތެރޭގައި އަންހެނުންނާއި ކުޑަކުދިން ހިމެނޭ ކަމަށްވެސް އެ އޭޖެންސީން މަޢުލޫމާތު ދީފައިވެއެވެ.
ސިވިލް ޑިފެންސްގެ ތަރުޖަމާނު މަޙްމޫދު ބަސަލް އޭއެފްޕީއަށް ދެއްވި މަޢުލޫމާތުގައި، ހަމަލާ ދީފައިވަނީ ބައިތު ލަހިޔާގެ ފަސް ބުރީގެ އިމާރާތަކަށް ކަމަށާއި، މިއީ އާންމުން ދިރިއުޅޭ އިމާރާތެއް ކަމަށް ވިދާޅުވިއެވެ. މީގެ އިތުރުން މި ހަމަލާގައި ހަތް މީހަކަށް އަނިޔާވެފައިވާ ކަމަށާއި، 59 މީހަކު ގެއްލިފައިވާ ކަމަށްވެސް އޭނާ ވިދާޅުވިއެވެ.
”ބަރު ހަތިޔާރުން ހަމަލާ ދިނުމާއި ބަޑި ޖެހުން އަދިވެސް ކުރިއަށް ދާތީ، މިހާރު ޒަޚަމްވެފައި ތިބި މީހުން ސަލާމަތް ނުކުރެވި، މަރުވާ މީހުންގެ އަދަދު އަދިވެސް އިތުރުވެދާނެ،“ ބަސަލް ވިދާޅުވިއެވެ.
އިޒްރޭލުގެ އަސްކަރިއްޔާއިން ބުނެފައިވަނީ މިއީ ”ޓެރަރިސްޓުންގެ އަމާޒުތަކަށް“ ދިން ހަމަލާތަކެއް ކަމަށެވެ. އަދި ބައިތު ލަހިޔާ ސަރަހައްދުގައި ”ޓެރަރިޒަމްގެ ހަރަކާތްތައް“ އިތުރުވަމުންދާ ކަމަށް ބުނެފައިވެއެވެ.
އަނެއްކޮޅުން، ޣައްޒާގައި ވެރިކަންކުރާ ހަމާސްއިން ބުނެފައިވަނީ އިޒްރޭލުގެ މި ޢަމަލަކީ ގަތުލު ޢާންމެއް ކަމަށާއި، މިއީ ފަލަސްތީނުގެ ނަސްލު ނައްތާލުމަށް، ހަތިޔާރެއް ނެތް އާންމުންނާ ދެކޮޅަށް އިޒްރޭލުން ހިންގަމުންދާ ކެމްޕެއިންގެ ބައެއް ކަމަށެވެ.
ޣައްޒާގެ ހެލްތު މިނިސްޓްރީން އާދީއްތަ ދުވަހު ބުނެފައިވަނީ 13 މަސް ދުވަސް ވެފައިވާ ހަނގުރާމައިގައި މަރުވި މީހުންގެ އަދަދު 43,846 އަށް މިހާރު އަރާފައިވާ ކަމަށެވެ. މިއީ އިޒްރޭލަށް މިދިޔަ އަހަރުގެ އޮކްޓޫބަރު 7 ގައި ހަމާސްއިން ދިން ހަމަލާތަކުގެ ބަދަލު ހިފުމަށް ކަމަށް ބުނެ އިޒްރޭލުން ދެމުން ގެންދާ ހަމަލާތަކެކެވެ.